செதுக்கிச் செதுக்கி அழகாக உருவான ஒரு சிற்பத்தை ஒருநாள் தரையில் போட்டு உடைத்தால் எப்படி இருக்கும்? அது மாதிரியான செயலாகத்தான் பார்க்கிறார்கள் அமலாக இருக்கும் புதிய குற்றவியல் சட்டத்தை. 

ஆங்கிலேயர்கள் நம்மை ஆண்டுகொண்டிருந்தபோது இரு குற்றவியல் சட்டங்கள் கொண்டுவரப்பட்டன. ஒன்று, இந்திய தண்டனைச் சட்டம் (ஐ.பி.சி 1860). இரண்டாவது, இந்திய சாட்சியச் சட்டம் (எவிடன்ஸ் ஆக்ட் 1872).

சுதந்திரம் பெற்ற இந்தியா மூன்றாவதாக ஒரு குற்றவியல் சட்டத்தைக் கொண்டுவந்தது. அது இந்திய நடைமுறைச் சட்டம் (சி.ஆர்.பி.சி 1983). இந்த மூன்று சட்டங்களைத்தான் குற்றவியல் சட்டம் என அழைப்பார்கள். 

இந்த மூன்றையும்தான் கடந்த டிசம்பர் மாதம் பாராளுமன்றம் காலியாக இருக்கும்போது சத்தமில்லாமல் மாற்றியது ஒன்றிய அரசு. புதிய சட்டங்களுக்கும் சமஸ்கிருத்தில்தான் பெயர். ‘பாரதிய நியாய சன்ஹிதா’ (தண்டனைச் சட்டம்), ‘பாரதிய நகரில் சுரக்‌ஷா’ (நடைமுறைச் சட்டம்) மற்றும் ‘பாரதிய சாட்சிய அதினியம்’ (சாட்சிய சட்டம்).

‘‘இந்தப் புதிய சட்டமே சட்ட விரோதமானது. அரசியலமைப்பு (கான்ஸ்டிடியூஷன்) விதி 348ன்படி ஒரு சட்டம் ஆங்கிலத்தில்தான் இருக்கவேண்டும். ஆனால், புதிய சட்டம் சமஸ்கிருதப் பெயரில் இருக்கிறது. 

இதுவே முதல் கோணல். அத்தோடு கடந்த டிசம்பரில் பாராளுமன்றத்தில் சுமார் 145 எதிர்க்கட்சி உறுப்பினர்களை சஸ்பெண்ட் செய்துவிட்டு இந்தச் சட்டத்தை ஒரே நாளில் எந்த விவாதமும் இல்லாமல் அரசு மறைமுகமாக இயற்றியதில் இருந்தே இது தவறான நோக்கத்துடன் கொண்டுவரப்பட்ட சட்டமோ என்ற சந்தேகம் எழுகிறது...’’ என்ற விஜயகுமார், தொடர்ந்தார்.

‘‘பழைய சட்டம் 150 வருடங்கள் பழமையானது. காலனிய காலத்தது என்று பாஜக சொல்லி புதியதைக் கொண்டு வந்தாலும் அது எத்தனையோ தடவை திருத்தம் செய்யப்பட்டு புடம் போடப்பட்ட சட்டம். ஆனால், புதியதாக இணைக்கப்பட்ட சட்டம் அப்படியல்ல. இப்புதிய சட்டம் 140 கோடி இந்தியர்களின் அன்றாட வாழ்க்கையை தினசரி சிக்கலுக்கு ஆளாக்கக் கூடியது.

எனவே இனிவரும் 30 அல்லது 40 வருடங்களுக்கு இரண்டு வகையான சட்டங்களின்படியும் வழக்குகள் நடத்தபடுவதற்கான விண்ணப்பங்கள் வரும்போது அது இரண்டு சட்டத்துக்குமே சிக்கலாக மாறும். 

ஏற்கனவே நிலுவை வழக்குகள் லட்சக்கணக்கில் தேங்கிக் கிடக்கும் சூழ்நிலையில் இந்த முரண்பாடும் சேர்ந்துகொள்ளும்போது மேலும் தேக்கம் ஏற்படும்...’’ என்று விஜயகுமார் சொல்ல, இந்திரா ஜெய்சிங் போன்ற வடநாட்டு மூத்த வழக்கறிஞர்கள் புதிய சட்டம் மிக கொடூரமானவையாக இருக்கின்றன... காவல்துறைக்கு அதிக அதிகாரத்தை வழங்குவதற்கான பல புதிய விதிகள் சேர்க்கப்பட்டிருக்கின்றன என விமர்சனம் செய்வது பற்றி அவரிடம் கேட்டோம்.

‘‘ஆமாம். எஃப்.ஐ.ஆர்., இல்லாவிட்டால் போலீசாரின் வரம்புகள் அதிகரிக்கும். அதுபோல பிரிவினைவாதம், தீவிரவாதம் போன்றவற்றை சிறப்பு சட்டமான ஊபா (UAPA - Unlawful Activities Prevention Act 1967) சட்டம்தான் இதுவரை அணுகியது. ‘ஊபா’ அதிகாரிகள்கூட ஒருவரை இதுதொடர்பாக கைது செய்யவேண்டும் என்றால் மேலதிகாரிகளிடம் அனுமதி வாங்கவேண்டும்.