சமீபகாலமாக முன்னணி நடிகர்களின் பழைய திரைப்படங்கள் ரீ-ரிலீஸாவது ட்ரெண்டிங்கில் உள்ளது. ஆனால், இந்த வாரம் தென்னிந்திய சினிமாவின் முன்னணி நடிகரான ஃபகத் பாசில், ‘பசங்க - 2’ படத்தின் கருவை ரீ-ரிலீஸ் செய்துள்ளார்! 

சமீபத்தில் குறைபாடுள்ள குழந்தைகளுக்கான பள்ளி நிகழ்வொன்றில் கலந்துகொண்டு பேசிய ஃபகத், ‘‘வயது கூடிய பின்பு ஏடிஹெச்டி எனும் கவனச்சிதறல் நோய் கண்டறியப்பட்டாலும் அதனை குணப்படுத்த முடியுமா..?’’ என்று அங்கிருந்த மருத்துவர் ஒருவரிடம் கேள்வியெழுப்ப... அவ்வளவுதான்... 41 வயதான ஃபகத்தின் ஏடிஹெச்டி அறிகுறிகளும், ‘பசங்க - 2’ திரைப்படத்தின் நயனா மற்றும் கவினின் குழந்தைப்பருவ ஏடிஹெச்டியும் இணையமெங்கும் இப்போது பேசு பொருளாகியுள்ளது.

ஏடிஹெச்டி யாருக்கு, எப்போது, எப்படி, ஏன் வருகிறது என்பதையும் அதற்கான தீர்வுகளையும் பற்றி நாம் தெரிந்துகொள்வோம்.‘‘சொன்ன பேச்சைக் கொஞ்சமும் கேக்கறதில்ல...’’‘‘ஒரு இடத்தில நிக்கறதே இல்ல...’’‘‘எப்ப பாரு கால்ல சக்கரம் கட்டிவிட்டது போல ஓடிட்டே இருக்கான்...’’‘‘விளையாடிட்டு இருக்கும்போதே திடீர்ன்னு அவனுக்குப் பிடிச்ச பாட்டரி பொம்மையைப் போட்டு உடைச்சுடறான்...’’- இது பெரும்பாலான தாய்மார்கள் தங்கள் குழந்தைகள் மீது வைக்கும் செல்லக் குற்றச்சாட்டுகள்தான்.

ஆனால், குழந்தைகளின் இந்த சொல்பேச்சு கேளாமை மற்றும் அதீத இயக்கம், சமயங்களில் கட்டுப்படுத்த முடியாத உணர்ச்சிமிகுந்த செயல்பாடுகளுடனும் (Impulsive Action) அதிக கவனக்குறைவுடனும் (Inattention) ஞாபகமறதியுடனும் இணையும்போது, ADHD எனும் மனநலக் குறைபாடாக அது வெளிப்படுகிறது.

Attention Deficit Hyperactivity Disorder என்பதுதான் ADHD. ‘கவனக்குறைவு மற்றும் மிகை இயக்க நோய்’, அதிலுள்ள சொற்களைப் போலவே ஒருசிலரில் வெறும் கவனக்குறைவு (Attention Deficit) சார்ந்த குறைபாடாகவும், ஒருசிலரில் அதீத இயக்கம் (Hyperactivity) சார்ந்த குறைபாடாகவும், ஒருசிலரில் இரண்டும் கலந்த குறைபாடாகவும் காணப்படுகிறது. 

ஆக, ஏடிஹெச்டி என்பது உண்மையில் ஒரு நோயல்ல... மனநலக் குறைபாட்டின் வெளிப்பாடே. அதிலும், ஏடிஹெச்டியால் பாதிக்கப்பட்டவர்களுக்கு அதன் அறிகுறிகள் ஒரே வயதில், ஒரே அளவில், ஒரேபோல எப்போதும் வெளிப்படுவதில்லை.

தகுந்த பள்ளிக்கல்வி, தக்க உடற்பயிற்சிகள், தியானப்பயிற்சிகள், இவற்றுடன் வைட்டமின் ஈ, சி மற்றும் ஒமேகா 6 கொழுப்பு அமிலங்கள் நிறைந்த இயற்கை உணவுகள் மற்றும் ஊட்டங்கள் இதில் நன்கு உதவுகின்றன.

ஏடிஹெச்டியைப் பொருத்தவரை மூளையின் நரம்பூக்கிகளான டோப்பமைன் மற்றும் நார்-அட்ரீனலின் அளவுகளில் மாற்றம் ஏற்படுவதால் இந்தக் குறைநிலை ஏற்படுகிறது என்றுகூறும் மருத்துவர்கள், ஏடிஹெச்டிக்கான சிகிச்சைக்கு இந்த நரம்பூக்கிகளை சமன்படுத்தும் மருந்துகளை குறிப்பாக மெத்தில் ஃபெனிடேட், டெக்ஸ் - ஆஃம்பீட்டமின் போன்ற ஊக்க மருந்துகளையும், தேவைப்படும்போது மன அழுத்தத்தைக் குறைத்து தூக்கத்தைக் கூட்டும் மருந்துகளையும் பரிந்துரைக்கின்றனர்.

இந்த மனநலக் குறைபாட்டை முழுமையாக குணப்படுத்த முடியாது என்றாலும், இதற்கான தொடர் சிகிச்சைகள், மனவியல் ஆலோசனைகள், தகுந்த கல்வி மற்றும் தொழில் சார்ந்த ஊக்கங்கள் இவர்களுக்கு இப்படியொரு குறைபாடு உள்ளது என்பதே தெரியாமல் இவர்களை வழிநடத்தும் என்பதே உண்மை.ஆக... ஏடிஹெச்டி என்பது குழந்தைப்பருவ குறைபாடுதான். 

ஆனால், ஃபகத் பாசில், அபிஷேக் பச்சன், எம்மா வாட்சன் என நமக்குத் தெரிந்த பிரபலங்களுக்கும், நம் அருகிலுள்ள சிலருக்கும் வயது கூடிய பின்னும் கூட காணப்படுகிறது என்றாலும் இந்தக் குறைபாட்டைக் கையாளும் முறைகளை அவர்களும் உடனிருப்பவர்களும் அறிந்தாலே போதுமானது..‘பசங்க - 2’ படத்தில் கூறப்படுவது போல, குழந்தைகளின் உலகை, அவர்களின் எண்ணங்களை, அவர்களின் உணர்வுகளை, அவர்களின் கனவுகளை உணர்வதும் அவர்களை வழிநடத்துவதும் அவசியமான ஒன்றுதானே..!