‘தென்னை மரத்தில் தேள் கொட்டினால் பனை மரத்தில் நெறி கட்டுமாம்...’ என்ற ஒரு சொற்றொடரை கேள்விப்பட்டிருப்போம். சம்பந்தமே இல்லாத இரண்டு விஷயங்களுக்கு இடையில் யாராவது ஒரு தொடர்பை ஏற்படுத்தினால் ஒரு ஆச்சரியம் வருமே... அந்த ஆச்சரியத்தில் உண்டானதுதான் இந்த சொற்றொடர். 

அதேமாதிரிதான் காலநிலை மாற்றத்தால் நாம் அன்றாடம்  உண்ணக்கூடிய நுகர்வுப் பொருட்களிலும் பெரிய பாதிப்பு ஏற்படும் என சூழல்வாதிகள் எச்சரிக்கிறார்கள்.உதாரணமாக பாமாயில், சாக்லேட்டுக்கு பயன்படும் கோக்கோவை எடுத்துக்கொள்வோம்.

உலகளவில் இந்தியாதான் சுமார் 20% பாமாயிலை இறக்குமதி செய்கிறது. அடுத்துதான் சீனா. உதாரணமாக இந்தியாவில் உற்பத்தி செய்யப்படும் சோப்புகளின் செலவில் சுமார் 50% வனஸ்பதி எடுத்துக்கொள்கிறது என்றால் எப்படி இருக்கும்? 

சோப்பு போடாமல் குளிக்கவேண்டியதுதான்!பாமாயில் இந்தியாவுக்கு அவசியமா என்று கேட்கலாம். சமையலுக்காக இந்தியர்கள் பயன்படுத்தும் எண்ணெயில் சுமார் 70% இடம் பாமாயிலுக்குத்தான். இனி வெங்காயம் இல்லாமல் சமைப்பது போல் பாமாயில் இல்லாமல் சமைப்பது எப்படி என்று யாராவது யூடியூபில் வீடியோ போடலாம்!

இந்தியாவில் சாக்லேட்டின் பயன்பாடு அதிகம். அதிலும் காதலுக்கு ஏற்ற உணவு என்று பில்டப் கொடுத்திருப்பதால் இந்த உணவுக்கு வரவேற்பு எக்கச்சக்கம். அதிலும் இன்ஸ்டண்ட் எனர்ஜி, காமத்தை தூண்டக்கூடியது... என்றெல்லாம் ஹைப் கிரியேட் செய்யப்பட்டிருப்பதால் இந்த உணவுக்கு அபாரமான வரவேற்பு. 

இந்த கோக்கோ பயிர் மேற்கு ஆப்பிரிக்க நாடுகளான ஐவரி கோஸ்ட் மற்றும் கானாவில்தான் அதிகம். இதுவும் உற்பத்தியில் சரிந்துகொண்டிருப்பதாக சொல்கிறார்கள் நிபுணர்கள்.

அதிகப் படியான மழை அல்லது மழையே இல்லாத வறட்சியைத்தான் கைகாட்டுகிறார்கள் நிபுணர்கள்.சில மணிநேரங்களில் அதிகப்படியான மழை அல்லது மழையே இல்லாத வறட்சிக்குக் காரணமாகச் சொல்லப்படுவது க்ளைமேட் சேன்ஞ் எனச் சொல்லப்படும் காலநிலை மாற்றம்தான். 

காலநிலை மாற்றம்தான் பூமி சூடாகுதல், பனிப் பாளங்கள் உடைப்பு, ஓசோன் ஓட்டை என்ற கேடுகளை எல்லாம் ஏற்படுத்துகிறது. இதற்கான காரணங்களாக நாம் பயன்படுத்தும் பெட்ரோல், டீசல், காடுகள் அழிப்பு போன்றவற்றைத்தான் நம்பர் ஒன் குற்றவாளிகளாக நிறுத்துகிறார்கள் சுற்றுச்சூழல்வாதிகள்.