தல புராணம்-சி.எஸ்.ஐ காது கேளாதோர் பள்ளி...

ஒரு பரந்தவெளியின் மையத்தில் பிரம்மாண்டமாக வீற்றிருக்கிறது அந்தப் பாழடைந்த கட்டடம். பார்ப்பதற்கு பங்களா போல ரசனையாக மிளிரும் அது, முன்னொரு காலத்தில் பள்ளியாகச் செயல்பட்டது என்றால் நம்பமுடியவில்லை. சென்னை சாந்தோம் சர்ச்சிலிருந்து சிறிது தொலைவிலேயே இருக்கும் சிஎஸ்ஐ காது கேளாதோர் மேல்நிலைப் பள்ளியின் பழைய தோற்றம் இப்படியாகவே உள்ளது. 1912ம் வருடம் தொடங்கப்பட்ட மெட்ராஸின் முதல் காது கேளாதோர் பள்ளி இது.

இன்று அந்தப் பழமையான கட்டடம் எச்சமாக நிற்க, அருகிலேயே புதிய கட்டடத்தில் 107 வருடங்களைக் கடந்து செயல்பட்டுக் கொண்டிருக்கிறது காது கேளாதோர் பள்ளி. எப்படி உருவானது?‘இங்கிலாந்து ஜெனானா மிஷனரி சொசைட்டி சர்ச்’சைச் சேர்ந்த ஃப்ளாரன்ஸ் ஸ்வேன்சன் என்கிற பெண்மணி இந்தக் காது கேளாதோர் பள்ளியைத் தோற்றுவித்தார். இவர் திறமையான செவிலியரும் கூட.

1882ம் வருடம் மதபோதகராக இந்தியா வந்த ஃப்ளாரன்ஸ், தன் சேவையை பஞ்சாபிலுள்ள அமிர்தசரஸில் இருந்து தொடங்கினார்.மதபோதனைகளால் நன்கு அறியப்பட்டவர் அங்கிருந்து பாளையங்கோட்டையிலுள்ள சாரா டக்கர் கல்வி நிறுவனத்தில் பணியாற்ற பணிக்கப்பட்டார். அங்கு பணியாற்றியபடியே சமூக சேவையும் செய்து வந்தார்.

ஒருநாள் பத்து வயதுள்ள காது கேளாத பெண் குழந்தை ஒன்று இவரிடம் மருத்துவத்திற்காக வந்தது. அந்தக் குழந்தைக்கு படிக்கவும், எழுதவும் கற்றுக் கொடுத்தார். தினமும் இந்தக் குழந்தைக்கு வகுப்பு எடுக்க, அவளைப் போல குறைபாடுள்ள நான்கு பெண் குழந்தைகள் வந்து சேர்ந்தனர். தொடர்ந்து, காது கேளாத குழந்தைகளுக்குப் பாடம் புகட்டுவதையே ஒரு சேவையாக ஆரம்பித்தார்.

பிறகு, சாரா டக்கர் வளாகத்திலேயே இவர்களுக்கு  படிப்புடன், தொழில்கல்வியும் போதித்தார் ஃப்ளாரன்ஸ். அதாவது, டெய்லரிங், அலங்கார வேலைப்பாடுகள் செய்தல், மசாலா பொருட்கள் தயாரித்தல்… இப்படியான பணிகளைக் கற்றுக் கொடுத்தார்.இதன்மூலம், சமூகத்திலிருந்து ஒதுக்கப்படும் இந்த மாற்றுத்   திறனாளி  குழந்தைகளிடம் நம்பிக்கை பிறக்கும் என நினைத்தார். அவர் நினைத்தது போலவே நடந்தது. இந்தக் குழந்தைகள் தங்கள் திறமையை நன்கு வளர்த்துக் கொண்டனர்.

இதுவே 1895ம் வருடம் காது கேளாதோருக்கான பள்ளியாக மாறியது. அடுத்த ஐந்து வருடங்களில் ஐந்து குழந்தைகள் என்பது இருபது ஆக உயர்ந்தது.
வெவ்வேறு அனாதைப் பள்ளிகளிலிருந்த காது கேளாத குழந்தைகள், இந்தக் குறைபாட்டின் காரணமாக ெபற்றோரால் கைவிடப்பட்ட குழந்தைகள் எனப் பலரும் இந்தப் பள்ளியில் இணைந்து படிக்கலாயினர்.

1897ம் வருடம் பாளை சென்ட்ரல் ஜெயில் எதிரே டாக்டர் தனகோடிராஜு என்பவருக்குச் சொந்தமான 14 ஏக்கர் நிலத்தை நான்காயிரத்து 500 ரூபாய் கொடுத்து வாங்கினார் ஃப்ளாரன்ஸ். இங்கிலாந்திலிருந்து வந்த நன்ெகாடை மூலம் இந்நிலம் வாங்கப்பட்டது.சாரா டக்கர் வளாகத்திலிருந்து இந்தப் புதிய இடத்திற்குப் பள்ளி இடமாற்றமானது. அதுவே, இன்று பாளையங்கோட்டையில் ஃப்ளாரன்ஸ் ஸ்வேன்சன் காது கேளாதோர் மேல்நிலைப் பள்ளியாகச் செயல்பட்டு வருகிறது.