திருமால் எடுத்த பத்து அவதாரங்களில் நரசிம்மாவதாரம் ஒன்று. ஏனைய அவதாரங்களைவிட பார்ப்பதற்கு நடுக்கத்தையும் அச்சத்தையும் விளைவிக்கும் பயங்கர அவதாரம். தனது தூய பக்தனின் பக்திக்காக இரண்ய கசிபுவை சம்ஹாரம் செய்து அவனது உடலைக் கிழித்து உதிரம் பருகும் நிலையில் பார்ப்போர் அஞ்சி நிலை குலையச் செய்யும் அவதாரம். 

ஏன் இந்த மூர்த்தி கண்டோர் அஞ்சும் வண்ணம்தான் இருக்க வேண்டுமா? சாந்த மூர்த்தியாய் விளங்கக்கூடாதா? ஆம் அவ்வாறு சாந்த மூர்த்தியாய்-அவரது மடியில் திருமகளை அமர்த்தி-லட்சுமி நரசிம்மனாகக் கண்டிருக்கிறார்கள். வைணவ அடியார்கள். பல பிரார்த்தனைத் தலங்களுள் திருக்கடிகை என்னும் சோளிங்கபுரத்திற்கு தனித்தொரு பெருமையுண்டு.

இது சென்னை-பெங்களூரு இரயில் மார்க்கத்தில் அரக்கோணத்திலிருந்து மேற்கே 27 கி.மீட்டர் தொலைவிலும், சென்னை-திருப்பதி இரயில் மார்க்கத்தில் திருத்தணி இரயில் நிலையத்திலிருந்து 27 கி.மீட்டர் மேற்கிலும் அமைந்துள்ளது. 

சென்னை, வேலூர், சித்தூரிலிருந்து பேருந்து வசதிகள் உள்ளன.இங்கேயுள்ள கோயிலில் அஹோபில, வராஹ, மாலோல, யோகாநந்த, பாவந, காரஞ்ச, சத்ரவட, பார்க்கவ, ஜூவால நரசிம்மன் என்று ஒன்பது நரசிம்மர் கோயில்கள் உண்டு. மலை மீதும் மலை அடிவாரத்திலுமாக ஒன்பது நரசிம்மர் சந்நதிகள் இருக்கின்றன.

கீழ் அஹோபிலத்தில் மூலவர் பிரகலாதன், லட்சுமி நரசிம்மன் வீற்றிருந்த திருக்கோலம். உத்ஸவர்மாலோல நரசிம்மர். தாயார் அம்ருதவல்லி, செஞ்சு தீர்த்தங்கள். விமானம் குகை விமானம். முதல் அழகிய சிங்கர்க்கு யோக ரூபத்தில் லட்சுமி நரசிம்மன் நேரிடையாக தரிசனம் தந்த இடம்.மேல் அஹோபில மடம் பத்து கிலோ மீட்டர் மலைமேல் பயணம் செய்தால் அடைந்துவிடலாம். 

இது ஒரு குடைவரை கோயில். மூலவர் அஹோபில நரசிம்மர். தாயார் லட்சுமி தீர்த்தம் பவ நாசினி-விமானம் குகை விமானம். பிரகலாதனுக்கு பிரத்யட்சம் ஆன தலம். பகவான் நரசிம்ம அவதாரம் எடுத்த அற்புதமான இயற்கை எழில் சூழ்ந்த ‘அஹோபிலம்’ மிக முக்கியமான புண்ணிய க்ஷேத்திரங்களில் ஒன்றாகும்.

திரு சோளிங்கபுரம் ஸ்ரீயோக நரசிம்மனின் பேரழகைப் பருகிப் பருகித் திளைத்த நம்மாழ்வரும் திருமங்கை ஆழ்வாரும் இப்பெருமானின் அழகிய ருசியை அக்கார அடிசிலுக்கு இணையென ஒரு கணம் சிந்தித்த போது, அவர்கள் திருவுள்ளத்திற்குத் திருப்தி ஏற்படவில்லை. 

இந்த எம்பெருமானின் திவ்ய அழகின் ருசி அக்கார அடிசிலை விட பல மடங்கும் உயர்ந்ததாக இருப்பதால், அவன் அழகை எவ்விதம் வர்ணிப்பது என்று அவர்கள் திகைத்தார்களாம்.