கையடக்கத்தில் கட்டுமானத் தொழில்!

‘‘தொழில்நுட்பம் வளர வளர நம்முடைய தொழிலையும் அதற்கேற்ப மாற்றிக் கொள்வதுதான் புத்திசாலித்தனம்’’ என்கிறார் கமலா. கட்டட தொழிலில் கால் பதித்திருக்கும் இவர் ‘மேஸ்திரி’ என்ற செயலி மூலம் பலதரப்பட்ட கட்டுமானத் தொழிலில் ஈடுபட்டிருப்பவர்களை ஒன்றாக இணைத்து செயலி மூலமாகவே அவர்களுக்கு ஒரு பிசினஸ் திட்டத்தினை ஏற்படுத்தி தருகிறார். ‘‘என்னுடைய 22 வயசில் இருந்தே நான் பிசினசில் ஈடுபட ஆரம்பிச்சேன். முதலில் ஃபேஷன் துறையில் டிப்ளமோ படிச்சேன்.

அதன் பிறகு க்ளோதிங் மற்றும் ஃபர்னிஷிங் சார்ந்த தொழிலை 18 வருடம் நடத்தி வந்தேன். அதன் பிறகு எங்களின் குடும்பத் தொழிலில் ஈடுபட வேண்டிய சூழல் ஏற்பட்டதால், என்னால் இந்த பிசினசில் முழுமையாக கவனம் செலுத்த முடியவில்லை. அதனால் அதை வேறு ஒருவரிடம் கொடுத்துவிட்டு முழுக்க முழுக்க குடும்பத் தொழிலில் என்னை இணைத்துக் கொண்டேன். எங்களுடையது 50 வருட நிறுவனம். அப்பாதான் இதனை நிர்வகித்து வந்தார்.