ஆச்சாரி பா

சமீபத்தில் ‘ஜியோ ஹாட்ஸ்டாரி’ல் நேரடியாக வெளியாகியிருக்கும் இந்திப்படம், ‘ஆச்சாரி பா’. குஜராத்தில் உள்ள சிறு நகரத்தில் வாழ்ந்து வருகிறார், ஜெய்ஸ்னவி. கணவனை இழந்த ஜெய்ஸ்னவிக்கு வயது 65. 

மும்பையில் வசித்து வரும் மகன் கேட்டனை சில வருடங்களாகப் பிரிந்து வாழ்ந்து வருகிறார் ஜெய்ஸ்னவி.  அம்மாவுக்கும், மகனுக்கும் எந்த தொடர்புமே இல்லை. இந்நிலையில் தன்னுடன் மும்பையில் வந்து தங்கும்படி அம்மாவுக்கு அழைப்பு விடுக்கிறான் மகன்.

மும்பைக்கு வந்து பார்த்தால் ஜெய்ஸ்னவிக்குப் பேரதிர்ச்சி காத்திருக்கிறது. ஆம்; ஜெய்ஸ்னவியின் மகன் தனது குடும்பத்துடன் டார்ஜிலிங்கிற்கு சுற்றுலா சென்றிருக்கிறான். வீட்டில் நாய் மட்டுமே இருக்கிறது. நாயைக் கவனித்துக்கொள்ளத்தான் அம்மாவை வீட்டுக்கு அழைத்திருக்கிறான் மகன். உடைந்து போகிறார் ஜெய்ஸ்னவி. 

இந்த தர்மசங்கடமான சூழலிலிருந்து எப்படி ஜெய்ஸ்னவி மீண்டு வருகிறார் என்பதை நெகிழ்ச்சியாகச் சொல்லியிருக்கிறது திரைக்கதை. சம காலத்தில் முதியவர்கள் தனித்து விடப்படுவதையும், குழந்தைகளால் கைவிடப்படும் பெற்றோர்களைப் பற்றியும் மென்மையாக சித்தரித்திருக்கிறது இந்தப் படம். இதன் இயக்குநர் ஹர்திக் கஜ்ஜார்.

ஐம்பது வருடங்களுக்கு முன்பு வெளியான ஜப்பானிய மொழிப்படம், ‘த புல்லட் டிரெய்ன்’. இதன் இரண்டாம் பாகம்தான், ‘புல்லட் டிரெய்ன் எக்ஸ்ப்லோஷன்’. சமீபத்தில்  ‘நெட்பிளிக்ஸி’ல் நேரடியாக வெளியான இந்த ஜப்பானியப் படம், தமிழ் டப்பிங்கிலும் காணக்கிடைக்கிறது. 

டகாய்ச்சியின் மேற்பார்வையில் சின் - அமோரியிலிருந்து டோக்கியோ வரை செல்கிறது ஒரு புல்லட் ரயில். புறப்பட்ட கொஞ்ச நேரத்தில் ஒரு போன் அழைப்பு வருகிறது. ரயிலில் அணுகுண்டு வைத்திருப்பதாகவும், மணிக்கு 100 கிலோ மீட்டர் வேகத்தில் ரயில் செல்ல வேண்டும். வேகம் குறைந்தால் அணுகுண்டு வெடித்து விடும் என்று போனில் அழைத்தவன் சொல்கிறான்.