மார்ட்டின் ஸ்கார்சிஸ்... அமெரிக்க திரைப்பட இயக்குநர், திரைக்கதை எழுத்தாளர், தயாரிப்பாளர், நடிகர் மற்றும் புதிய ஹாலிவுட் திரை வரலாற்றாசிரியர். ஹாலிவுட்டின் பல திரைப்படம் சார்ந்த சங்கங்கள், தொழில்நுட்ப சம்மேளனங்கள் என பல குழுக்களின் தலைவராகவும் இவர் விளங்குகிறார். 

மட்டுமல்ல, திரைப்படத்திற்குத் தாம் அளித்த பங்களிப்பிற்காக ஏஎஃப்ஐயின் வாழ்நாள் விருதினை அவர் பெற்றுள்ளார். ஒரு ஆஸ்கார், நான்கு கோல்டன் குளோப், மூன்று பாஃப்தா மற்றும் அமெரிக்காவின் இயக்குநர் கழகம் ஆகியவற்றின் விருதுகளையும் வென்றுள்ளார்.

ஆனால், இந்த ரீல்ஸ் ஸ்க்ரோலிங் மக்கள் எல்லையைக் கடக்கிறார்கள். ஓர் இரண்டரை மணி நேரம் மொபைலுக்கு ஓய்வு கொடுக்க முடியவில்லை எனில் - அவசர அழைப்புகள் தவிர - நீங்கள் ஏன் திரையரங்கங்களுக்கு வருகிறீர்கள்?’’ என கேள்வி எழுப்புகிறார் மகேஷ் பட்.‘‘மார்ட்டினின் கூற்று அதிர்ச்சியாக இருந்தாலும் உண்மை நிலை அதுதான். 

இது திரைப்படக் கலைஞர்களுக்கு கடினமான காலம்தான். குறுகிய காலத்தில் விளக்கக் கூடிய கதைகளை மக்கள் விரும்பத் துவங்கிவிட்டனர். அதனால்தான் இன்ஸ்டன்டான இன்ஸ்டா ரீல்ஸ்கள் இன்று மக்களால் அதிகம் பார்க்கப்படுகிறது.

படம் துவங்கிய சிறிது நேரத்தில் அத்தனை பேரும் மொபைலை உயர்த்தி வீடியோ எடுக்கிறார்கள். இந்த நிலையை உலகப் புகழ்பெற்ற திரைப்பட விழாக்களில் கூட காண முடிகிறது.

வீடு தேடி வந்து விட்ட சினிமா இப்போது திரையரங்குகளில் இருக்கும் சினிமாவை குப்பை போல் மாற்றிவிட்டது. சினிமா தியேட்டர்களுக்கு வருவது ஸ்நாக்ஸ் சாப்பிடுவதற்கும் ஏதாவது ஒரு காரணத்தைச் சொல்லி குடும்பத்துடன் வெளியே வருவதற்குமான இடமாக மாறிவிட்டது.

படம் துவங்கியதுமே ஸ்நாக்ஸ் பாக்கெட்டுகளுடன் உள்ளே வரும் பார்வையாளர்கள் பாக்கெட்டை பிரிக்கும் சப்தம் முதல் பாப்கார்ன் சாப்பிடும் சத்தம் வரை அத்தனையும் படம் பார்க்கும் அனுபவத்தையே முழுமையாகக் கெடுத்து விடுகிறது...’’ என்கிறார் இயக்குநரும் திரைக்கதை ஆசிரியருமான ஆனந்த் மகாதேவன்.

இந்தி தயாரிப்பாளரும் படத் தொகுப்பாளருமான அமித் அகர்வால், ‘‘ஓய்வு நேரத்தில் பலவிதமான வேலைகளைச் செய்து மக்கள் பழக்கப்பட்டு விட்டனர். இப்பொழுது மல்டி டாஸ்க்கிங் மிகவும் எளிது என்கையில் அதையே திசை திருப்பும் அளவிற்கு படங்கள் கொடுக்க வேண்டிய கட்டாயத்திற்கு இன்று சினிமா கலைஞர்கள் தள்ளப்பட்டிருக்கிறோம். 

பார்வையாளர்களை எங்கேஜ் செய்யும் விதத்தில் ஒரு படத்தை கொடுக்க முடிபவன்தான் உண்மையில் வெற்றியாளன். இப்போதும் மிகச்சில படங்கள், மிகச் சில கலைஞர்கள் அந்த வேலையை எந்தத் தடையும் இல்லாமல் செய்கிறார்கள்.

அவர்களைப் போலவே பார்வையாளனைக் கட்டிப்போடும் கலையை இந்திய சினிமா கலைஞர்கள் கற்றுக்கொள்ள வேண்டிய காலம் இது. வேறு வழியே இல்லை. இந்த நிலையை நாம் எதிர்கொள்ளத்தான் வேண்டும்...’’ என்கிறார் அமித் அகர்வால்.‘‘திரையரங்கங்கள் பொது இடம். இது உனக்கானது மட்டுமல்ல என்பதனாலேயே 1910ம் வருடங்களிலேயே வசனம் இல்லாமல் வெளியான மௌனத் திரைப்படங்களில் இடையூறு குறித்த விளம்பரங்கள் பயன்படுத்தப்பட்டுள்ளன. 

அக்காலத்தில் ஆண்கள் / பெண்கள் பெரிய அளவிலான தொப்பிகள் அணிவதுண்டு. அதனை அடிப்படையாகக் கொண்டு ‘ரிமூவ் யுவர் ஹேட்’, பெண்களைக் குறி வைத்து நடக்கும் சீண்டல்களுக்கான பேனர்கள் உட்பட 100 வருடங்களுக்கு முன்பே இந்த டிஸ்க்ளைமர்கள் புழக்கத்துக்கு வந்துவிட்டன.

இப்போதும் சில நாடுகள் இந்தத் திரையரங்க கட்டுப்பாடுகளை மீறுபவர்களுக்கு கடுமையான தண்டனைகள் மற்றும் அபராதங்களை விதிக்கின்றன.சீனா, ஜப்பான், ஐரோப்பாவில் சில நாடுகள், சவுதி அரேபியா, குவைத் உள்ளிட்ட நாடுகளில் பொது இடங்களில் சில முக்கியக் கட்டுப்பாடுகளை கடுமையாகவே கடைப்பிடிக்கிறார்கள். 

அவற்றில் சினிமா திரையரங்கங்களுக்கு என கட்டுப்பாடுகள் Terms & conditions அடிப்படையில் டிக்கெட்டுகளிலேயே பிரிண்ட் செய்யப்பட்டு கொடுக்கப்படுகின்றன.படம் துவங்கி விட்டால் அதன் பிறகு வரும் பார்வையாளர்களுக்கு அனுமதி மறுப்பு... விளம்பரங்கள் ஒளிபரப்பப்படும் நேரம் வரைதான் கால அவகாசம் கொடுக்கப்படும்.

நான்கு வயதிற்குக் கீழ் உள்ள குழந்தைகளை அழைத்து வர அனுமதி கிடையாது. அப்படியே அழைத்து வர வேண்டும் எனில் குழந்தைகளுக்காகவே உருவாக்கப்பட்ட திரையரங்குகளுக்கு மட்டும்தான் செல்ல வேண்டும். 

அல்லது அது குழந்தைகளுக்கான திரைப்படமாக இருக்க வேண்டும்.சென்சார் தரப்பு இந்த வயதினருக்கு மட்டும்தான் என பரிந்துரைக்கப்பட்ட படங்களுக்கு அதற்குக் கீழ் குறைந்த வயதில் உள்ளவர்களுக்கு அனுமதி மறுப்பு. மீறி அழைத்து வந்து பிரச்னை செய்தால் கடுமையான அபராதம் விதிக்கப்படும்.

மொபைல் போன்களை நிச்சயம் பயன்படுத்தவே கூடாது. 

குறிப்பாக வீடியோ பதிவு செய்தால் அபராதம் மற்றும் தொடர்ந்து சினிமா பார்ப்பதற்கும் தடை.திரையரங்கத்தில் வெளிச்சம் இல்லை என்பதற்காக இது உங்களுக்கான அந்தரங்க இடம் கிடையாது. காதல் அத்துமீறல்களுக்கு இங்கே அனுமதி இல்லை. பேசுவதும் கூடாது.

இருக்கையில் இருந்து எழுந்து செல்லும் பொழுது திரையைப் பார்த்த வண்ணம்தான் செல்ல வேண்டும். உங்களது உடலின் பின்பகுதி முன்னிருக்கையில் உட்கார்ந்திருப்பவர் தலையில் இடிக்கவே கூடாது. அப்படி இடித்து ஒருவேளை முன்னிருக்கையில் இருப்பவர் புகார் தெரிவித்தால் கடுமையான அபராதம் விதிக்கப்படும் அல்லது உடனடியாக அரங்கத்தில் இருந்து வெளியேற்றப்படுவர்.

இப்படி பலவிதமான திரையரங்க கட்டுப்பாடுகள் உருவாக்கப்பட்டு உலகின் பல நாடுகள் கடைப்பிடித்து வருகின்றன. எனவேதான் அங்கே சினிமா தொழில் தடை இல்லாமல் நடக்கின்றது.

இங்கே ரஜினி, விஜய் மற்றும் அஜித் போன்ற நடிகர்களின் திரைப்படம் ஒரு நாள் வெளியானாலே அடுத்து இன்சூரன்ஸ் பெறும் அளவிற்கு திரையரங்குகள் அடித்து நொறுக்கப்படுகின்றன.