“யாரிடமாவது பேசினால் அவர்கள் சொல்லும் விஷயத்தைக் கொண்டு ஒரு கதை உருவாக்குவேன். அதே போல் என் கண்களில் தென்படும் சின்ன சின்னவிஷயங்களை கொண்டு ஒரு கதை எழுதிடுவேன்.

அதனாலேயே அதிகம் வெளியே போவேன். சீக்கிரமா ஒரு புத்தக ஆசிரியராக வர வேண்டும். சிறுவர்களை கதைப் புத்தகம் படிக்க வைக்க வேண்டும் என்பதால் அவர்களுக்கு பிடித்த தலைப்புகள் வைத்து கதைகள் உருவாக்கி எழுதி வருகிறேன்” என மழைலை மொழியில் தான் ஒரு “கதை சொல்லி, கதை ஆசிரியர்” என்று தன்னை அறிமுகப்படுத்திக் கொள்கிறார் கோவையை சேர்ந்த ஒன்பது வயது ஹர்ஷவர்தினி ராஜேஷ்.

“அப்பா, அம்மா இருவரும் பள்ளி ஆசிரியர்கள். நான் 11 புத்தகங்கள் எழுத காரணம் என் பெற்றோர்கள் ஒரு பக்கம் இருந்தாலும், என்னை மேலும் உற்சாகப்படுத்தியது என் அக்கா வர்தினி ராஜேஷ்” என்று தன் குடும்பத்தாரை அறிமுகம் செய்யும் ஹர்ஷவர்தினி, எழுத்தாளரான கதையை தோழியரோடு பகிற்கிறார். ‘‘சிறு வயதிலிருந்தே எனக்கு புத்தகங்கள் படிக்கும் பழக்கம் உண்டு. பள்ளிக்கூடத்தில் நடக்கும் பேச்சு போட்டி, நாடக போட்டி, ஓவிய போட்டி, கட்டுரை எழுதும் போட்டி, கதை எழுதும் போட்டி என அனைத்து போட்டிகளிலும் கலந்து கொள்வேன்.

அப்படி இருக்கும் போது, சிறார் எழுத்தாளர் கன்னி கோவில் ராஜா மாமா, குழந்தைகளுக்காக நிறைய ஆக்டிவிட்டிஸ் பண்ணிட்டு இருக்காங்க. அவர் ஒருங்கிணைத்த ஒரு பயிற்சி பட்டறையில் ஒரு படம் கொடுத்து அந்த படத்துக்கு கதை எழுத சொன்னாங்க. அதை அம்மாவிடம் சொல்ல சொல்ல அவங்க டைப் பண்ணி அனுப்பினாங்க. நான் எழுதின அந்த கதைக்கு மூன்றாம் பரிசு கிடைத்தது.

அதற்கான வாழ்த்துரை முன்னாள் அமைச்சர் வேலுமணி அவர்களிடம் வாங்கினோம். அம்மா-அப்பாவின் 18வது திருமண நாளன்று என் 18 கதைகள் அடங்கிய புத்தகத்தை வெளியிடலாம் என்று முடிவு செய்தேன். அதை பதிப்பிக்க விஜயா பதிப்பகத்தை அணுகிய போது, ‘ரொம்ப அருமையா இருக்கு, தாராளமா நாங்க பண்ணி கொடுக்கிறோம்’னு சொன்னாங்க. அந்த ஆசி எனக்கு மேலும் உற்சாகத்தை கொடுத்தது. 

நான் கதை சொல்ல சொல்ல, அம்மா டைப் பண்ணுவாங்க, அக்கா அதுக்கு ஏற்ற மாதிரி ஓவியம் வரைவாங்க. சின்ன வயதில் எழுதி இருப்பதால், ‘விருதுக்கு ஏதாவது முயற்சி பண்ணுங்க’னு திரைப்பட இயக்குநர் அமுதவாணன் மாமா அதற்கும் ஒரு வழிகாட்டினார்.

கோவையில் டி.ஆர்.ஓ தலைமையில் புத்தகம் வெளியிட்டோம். அங்கு வந்திருந்த தமிழன் புக் ஆஃப் ரெக்கார்டு சார்ந்திருந்தவர்கள், நான்தான் இந்த கதை எல்லாம் எழுதினேனா என்று தெரிந்து கொள்வதற்காக, ‘ஒரு பையன், மழை, குடை, நீர்’ இந்த நான்கு வார்த்தைகள் சொல்லி கதை சொல்ல சொன்னாங்க.

அதை வைத்து ஒரு கதை சொன்னேன். அடுத்து இந்தியன் ரெக்கார்டு. அவங்க இன்னும் கொஞ்ம் கூடுதலான வார்த்தைகள் கொடுத்து என்னை கதை எழுதவும், அக்காவை அதற்கு ஏற்றர் போல் ஓவியமும் வரைய சொல்லி 45 நிமிடம் கொடுத்தார்கள். நாங்கள் 38 நிமிடத்திலேயே முடிச்சு, அதே மேடையில் ‘இளம் சாதனையாளர்கள் விருது’ பெற்றோம்” என்கிற ஹர்ஷவர்தினி தான் எழுதிய புத்தகங்கள் குறித்து சிறு அறிமுகம் கொடுத்தார்.

சமீபத்தில் ட்ரெண்டான ‘குக்கு குக்கு…’ பாட்டு வச்சு, ராஜா மாமா, ‘இந்த பாட்டுக்குள் நிறைய விலங்குகள், மரங்கள் எல்லாம் இருக்கு. யார் முதலில் கண்டுபிடித்து சொல்றாங்க’னு பார்க்கலாம் என்று ஒரு ஆக்டிவிட்டி கொடுத்தார். உடனே அந்த பாட்டு கேட்டு கேட்டு எழுதி வச்சு அவருக்கு அனுப்பியதும், அன்று மாலையே இதை எல்லாம் வைத்து ‘குக்கு குக்கு தவளைகள்’ என்கிற கதை உருவாக்கினேன்.

இதற்கடுத்து ‘மேக்கப் போட்ட விலங்குகள்’ என்ற புத்தகம் கொஞ்சம் நகைச்சுவையா எழுதலாம்னு முயற்சி செய்திருக்கிறேன். அழிந்து வரக் கூடிய விலங்கினங்கள் பற்றி அப்பா, அம்மா கொடுத்த விவரங்களை வைத்து, ‘காட்டுக்குள் திருவிழா’ என்ற புத்தகம் எழுதி இருக்கேன்.

“ஹர்ஷவர்தினி சொல்லும் கதைகளுக்கு ஏற்றார் போல் நான் ஓவியம் வரைவேன். இதோடு எட்டு தொகை பத்து பாடல்களில் இருந்து, ஐம்பது பாடல்களை ஓவியமாக வரையலாமானு அம்மா கேட்டாங்க. முயற்சி செய்து பார்க்கலாம்னு, இரண்டு நாட்களில் 39 பாடல்கள் எடுத்து அம்மா விரிவா சொன்னாங்க.

அதை மனதில் வாங்கி உடனே வரைய ஆரம்பித்தேன். அப்படி வரைந்த அந்த புத்தகத்திற்கு ‘குறுந்தொகை நில காட்சிகள்’ என பெயர் வைத்தோம். இந்த புத்தகங்களை தலைமை செயலகத்தில் பள்ளிக் கல்வித்துறை அமைச்சர் அன்பில் மகேஷ் பொய்யாமொழி அவர்கள் வெளியிட்டாங்க. ‘நான்காம் வகுப்பு படிக்கிற குழந்தை கதைகள் எழுதுவதை இதற்கு முன் பார்க்கவில்லை. கதைகளும் அருமையாக இருக்கிறது’ என்று அவர் கூறிய உற்சாக வார்த்தைகளை கொண்டு தொடர்ந்து செயல்படுகிறோம்” என்கிறார் வர்தினி.

இந்த புத்தகங்களுக்கு அடுத்து இப்போது ஒரு புத்தகம்  ஹர்ஷவர்தினி எழுத அதற்கான படங்களை வர்தினி வரைந்து கொண்டு இருக்கிறாள். ‘இது வரை யாரும் இந்த கருவைக் கொண்டு புத்தகமாக எழுதியதில்லை. பெரியவங்களே கொஞ்சம் யோசிப்பார்கள். குழந்தை செய்திருக்கா...அதை நாங்கள் வெளியிடுகிறோம்’ என்று விஜயா பதிப்பகத்தார் கூறியுள்ளார்கள்.

மேலும் அந்த புத்தகத்தை தமிழக முதல் அமைச்சர் ஸ்டாலின் அவர்கள் கையால் வெளியிடலாம் என்று சொல்லி இருக்காங்க. குழந்தைகளுக்கு பிடித்திருப்பதை செய்வதற்கு நாங்கள் தடையாக இல்லை. அதே போல் நாங்கள் இதைத்தான் செய்ய வேண்டும் என்று கட்டாயப்படுத்துவதில்லை. அவர்கள் விரும்பியது செய்வதற்கு ஊக்கமாகவும், உறுதுணையாகவும் இருக்கிறோம்” என்கிறார் ராஜலட்சுமி.