‘‘என்னுடைய இளங்கலை படிப்பின் இறுதி ப்ராஜெட்டாக மாணவர்கள் அனைவரும் கமர்ஷியல் ஆர்ட் செய்ய வேண்டும் என்றார்கள். அப்போது நான் தேர்ந்தெடுத்தது உணவு சம்பந்தமான வணிகங்களை தான். அப்போதுதான் முதல் முறையாக உணவு சார்ந்த ஓவியங்களை வரைய ஆரம்பித்தேன்.

நான் ஒரு பெரிய ஃபூடி. எனக்கு விதவிதமான உணவு வகைகளை ருசிப்பது பிடிக்கும். யாருக்கும் தெரியாத, குறிப்பிட்ட இடத்தில் மட்டுமே பிரபலமான உணவுகளை தேடிச் சென்று சாப்பிடுவேன். ரோட்டு கடையில் தொடங்கி, பெரிய நட்சத்திர உணவகங்கள் வரை நல்ல உணவு எங்கு கிடைத்தாலும் அதன் தினசரி வாடிக்கையாளராக நான் இருப்பேன். இந்த உணவின் மீதான பிரியத்துடன் கலை மீதான எனது ஆர்வத்தையும் இணைத்து ஃபுட் கார்ட்டூனிஸ்டாக/ இலுஸ்ட்ரேட்டராக ஒரு வித்தியாசமான பாதையைத் தேர்வு செய்தேன்.

எனக்கு மிகை-யதார்த்தமான ஓவியங்களை வரைவதில் விருப்பமில்லை. அப்படி தத்ரூபமாக வரைவதற்குப் பதில் புகைப்படம் எடுத்துக்கொள்ளலாமே எனத் தோன்றும். என் ஓவியங்களில் கலையும் உணர்ச்சியும் இருக்கும். என்னுடைய தனி ஸ்டைலில் நான் மிளிர விரும்புகிறேன். அடுத்ததாக நான் ஒரு குக்-புக் உருவாக்கி வருகிறேன்.

ஒரு சர்வதேச வாடிக்கையாளருக்காகப் புத்தகத்தின் அட்டை படங்களையும், இலுஸ்ட்ரேஷனும் செய்து வருகிறேன். எனக்கு பெரிய திட்டங்கள் ஏதுமில்லை. தினமும் வரைய வேண்டும், தொடர்ந்து வரைய வேண்டும் என்பதே என்னுடைய ஆசை. அதற்கான அனைத்து வாய்ப்புகளையும் பயன்படுத்தி வருகிறேன்” என முடிக்கிறார் அடாஷி சைனி.