இரவில் அடிவாரத்தில் தங்கிவிட்டு, அடுத்த நாள் காலையில் மலையேற ஆரம்பித்தனர். இந்த மலையில் ஏறுவது கடினம். மலை செங்குத்தாகச் செல்லும். கீழே தவறி விழுவதற்கான வாய்ப்புகள் அதிகம். இதுபோக வெயில் சுட்டெரிக்கும். ‘‘எங்களுக்குப் பெரும் சவாலாக இருந்தது வெயில்தான். 

வெயிலைத் தாங்கிக்கொண்டே செரன் மலையேறினாள். உச்சியை அடைந்தவுடன், அதை வீடியோவாக்கி சமூக வலைத்தளங்களில் பதிவிட்டோம். இன்ஸ்டாவில் செரனை பின்தொடர்பவர்கள் அனைவரும் செரனுக்கு வாழ்த்து தெரிவித்து, பாராட்டினார்கள்...’’ என்கிறார் கிளின்.

இதுபோக டப்கல் மலை மாதிரியான சிறு மலைகளில் அப்பாவும், மகளும் ஏறி பயிற்சி செய்திருக்கின்றனர். மட்டுமல்ல, நான்கு வயதிலேயே மலையேறி சாதனை செய்திருக்கிறார் செரன். ஆம்; ஸ்காட்லாந்து, இங்கிலாந்து, வேல்ஸில் இருக்கும் மூன்று உயரமான மலைகளில் அப்பாவுடன் சேர்ந்து ஏறியிருக்கிறார். 

அப்போது அவருக்கு வயது 4 தான். இந்த மூன்று மலைகளிலும் ஏற இரண்டு நாட்கள் ஆகியிருக்கிறது. கிளினுக்கு ஒரு மகனும் இருக்கிறார். ஆனால், மகனுக்கு மலையேற்ற சாகசங்களில் விருப்பமில்லை. அதனால் கிளின் மகனைத் தன்னுடன் அழைத்துச் செல்வதில்லை.

செரனுக்கு மூன்று வயதாக இருந்தபோது வீட்டுக்கு அருகில் ஒரு மலையேற்றத்துக்கு உடன் அழைத்துச் சென்றிருக்கிறார் கிளின். மலையின் உச்சிக்குச் சென்று, உயரத்திலிருந்து சுற்றியிருக்கும் இடங்களைப் பார்த்தபோது செரனுக்கு பிரமிப்பாக இருந்திருக்கிறது. 

அன்றிலிருந்து மலையேற்றம் அவருக்குப் பிடித்துப் போய்விட்டது. அப்பாவுடன் எல்லா மலையேற்றத்துக்கும் செல்ல ஆரம்பித்தார். மகளுக்கு இருக்கும் ஆர்வத்தைப் பார்த்து முறையாக மலையேற்றப் பயிற்சியைச் செரனுக்குக் கொடுத்திருக்கிறார் கிளின்.

‘‘அப்பாவுடன் இருப்பது ரொம்பவே பிடித்திருக்கிறது. மலையின் உச்சிக்குச் சென்று உலகைப் பார்க்கும்போது ரொம்பவே அழகாக இருக்கிறது...’’ என்று மழலை மொழியில் சொல்கிறார் செரன்.