இயக்குநர் சரண் என்றதும் அஜித் கண் முன் வந்து நிற்பார். ‘காதல் மன்னன்’, ‘அமர்க்களம்’, ‘அட்டகாசம்’, ‘அசல்’ என்று அஜித்தை வைத்து அதிகமான படங்களை இயக்கியவர்.

இவருடைய சாதனையை சமீபத்தில் இயக்குநர் சிவாவும் தொட்டிருப்பதாக அவரே ஞாபகப்படுத்துகிறார். சமீபத்தில் இயக்குநர் சரணை சந்தித்தோம். ‘மார்க்கெட் ராஜா எம்.பி.பி.எஸ்’ படத்தைக் குறித்தும் தமிழ் சினிமாவைக் குறித்தும் நம்மிடம் பகிர்ந்துகொண்டார்.

“ஃபேன்டஸி ஆக்‌ஷன் ஜானர்ல இந்தப் படத்தைப் பண்ணியுள்ளேன். இந்த வகையான படத்தை இதுவரை நான் இயக்கியதில்லை. ஆனால் இந்த வகையான படமான ‘முனி’ படத்தை நான் தயாரித்துள்ளேன். ‘முனி’யில் ஆரம்பித்து வைத்த அவ்வகை ஜானர் படங்களின் தாக்கம் இன்றளவும் தொடர்கிறது.

ஆனால் நான் அதே பாணியில் போகாமல் அதே விஷயத்தை வேறு விதமாக சொல்லியிருக்கிறேன். பெரிய ரவுடி. அவன் உலக ரவுடிகள் யாருமே சந்திக்காத பிரச்சனையை சந்திக்கிறான். அதிலிருந்து அவன் எப்படி வெளியே வருகிறான் என்பதுதான் படத்தின் ஸ்டோரி லைன்.”