சினிமாவாக ரெடியாகியிருக்கிறது தமிழகத்தை உலுக்கிய பிரபல கொலைவழக்கு!

சென்சாரின் சிலந்தி வலையில் சிக்கித் தவித்த படம், ஒரு வழியாக டைட்டில் மாற்றத்தோடு ரிலீஸ் ஆகியிருக்கிறது. அந்தப் படம்தான் ‘நுங்கம்பாக்கம்’.“சென்னை மாதிரியான ஒரு மெட்ரோபாலிடன் சிட்டியில், பிஸியான ரயில்வே ஸ்டேஷனில் நடந்த கொடூரமான கிரைம் அது. நாட்டையே உலுக்கிப் போட்டுடிச்சு.

அதுபோன்ற ஒரு குற்றம் திரும்ப நடக்கக் கூடாதுங்கிற நோக்கத்தோடுதான் இந்தப் படத்தை எடுத்தேன். சுவாதியோட தனிப்பட்ட வாழ்க்கையோ, ராம்குமாரோட தனிப்பட்ட வாழ்க்கையோ இந்தப் படத்துல கிடையாது. இந்த கொலை எப்படி நடந்தது, ராம்குமாரை எப்படி போலீஸ் பிடிச்சாங்க, இந்த விஷயங்கள்தான் படத்துல இருக்கும். அதேசமயம் வேறு விஷயங்களும் இருக்கிறது” என சஸ்பென்ஸ் வைத்து பேச ஆரம்பிக்கிறார் டைரக்டர் ரமேஷ் செல்வன்.

“இந்த சம்பவம் தொடர்பா மக்கள், மீடியா மூலமா நிறைய தகவல்கள் பரவியது. மக்கள் இந்த சம்பவத்தை எப்படி பார்த்தாங்க, அவங்களோட கண்ணோட்டம் என்னாங்கிறதும் படத்துல சொல்லியிருக்கேன். சென்சார் போர்டுக்கு படம் காட்டினதும் ஏகப்பட்ட கரெக்‌ஷன் சொன்னாங்க. கேரக்டர்கள் பெயர் எல்லாம் மாத்த சொன்னாங்க. பிறகு படம் பெயரும் மாத்த சொன்னாங்க. இதையெல்லாம் பண்ணிட்ட பிறகு இப்போ படம் ரிலீசுக்கு தயாராக இருக்கு.

ஒரு உண்மைச் சம்பவத்தை வியாபாரம் பண்ற டைரக்டர் நான் கிடையாது. இதுவரைக்கும் நான் பண்ணின படங்கள்ல நல்ல கருத்துகள் தான் சொல்லியிருக்கேன். யாரோட தனிப்பட்ட வாழ்க்கையையும் நான் படமா எடுக்கல. பொது இடத்துல நடந்த ஒரு சம்பவத்தைத்தான் படமா எடுத்திருக்கேன். இதுபற்றிய விழிப்புணர்வு மக்கள்கிட்ட வரணும்கிறது மட்டும்தான் நோக்கமா இருந்துச்சு.