‘96’ படத்தில் சின்ன வயசு த்ரிஷாவாக நடித்து ரசிகர்களைக் கவர்ந்திருப்பவர் கவுரி கிருஷ்ணன். சென்னை பெண்ணான இவர் இப்போது பெங்களூரில் காலேஜ் படித்துக் கொண்டிருக்கிறார்.

“கேரளாவின் வைக்கம்தான் நான் பிறந்த ஊர். சென்னையில் பிளஸ் டூ வரை படிச்சேன். இப்ப பெங்களூருல பி.ஏ ஜர்னலிஸம் படிக்கிறேன். இது ரெண்டாவது வருஷம். அப்பா, அம்மா சென்னையில் இருக்காங்க. நானும், அண்ணனும் பெங்களூருல தங்கி படிக்கிறோம். லீவு கிடைச்சா போதும், சென்னைக்கு வந்துடுவேன்” என்று பேச ஆரம்பித்தார்.

“டைரக்டர் பிரேம் குமாரின் ‘96’ படத்துக்கு ஆடிஷன் நடக்குதுன்னு கேள்விப்பட்டேன். துபாயில் இருக்கும் கிருஷ்ணகுமார், பிரேம்குமாரோட நெருங்கிய நண்பர். அவர் மூலமா எனக்கு இந்த வாய்ப்பு கிடைச்சது.

முதல்ல ஆடிஷன் நடந்தது. பிறகு ஸ்கிரீன் டெஸ்ட் எடுத்தாங்க. ரெண்டுலயும் நான் ஓக்கே ஆனேன். முதல் காட்சி கும்பகோணத்தில் இருக்கிற ஸ்கூல்ல எடுத்தாங்க. நானும், ஆதித்யா பாஸ்கரும் நடிச்சோம். பர்த் டே காட்சி அது. ரெண்டு பேருமே ரொம்ப நேச்சுரலா நடிச்சோம்.”

“இப்ப தமிழ் மற்றும் மலையாளப் படங்களில் நடிக்க நிறைய வாய்ப்பு வந்துக்கிட்டிருக்கு. ஆனா, இன்னும் ஒன்றரை வருஷம் நான் காலேஜில் படிக்க வேண்டியிருக்கு. லீவு போட வசதியா இருந்து, நல்ல கேரக்டர் கிடைச்சா மட்டும்தான் நடிப்பேன். ஸ்கிரிப்ட்டும், என் கேரக்டரும் நல்லா இருந்தா போதும்.

சப்போர்ட்டிங் கேரக்டரா இருந்தாலும் நடிப்பேன். ஆனா, என்னை ஹீரோயினா நடிக்கச் சொல்லி கேட்கிறாங்க. காலமும், நேரமும் என்ன தீர்மானிக்குதோ அதன்படிதான் முடிவெடுக்கணும். இப்படித்தான் நடிப்பேன், இந்தக் கேரக்டர் மட்டும்தான் பண்ணுவேன்னு அடம்பிடிக்க மாட்டேன்.