காளி வேடமணிந்து வினோத தசரா பண்டிகை!

நவராத்திரி பத்து நாட்கள் தமிழகத்தில் பெரும்பாலான வீடுகளில் கொலு வைத்து வழிபாடு செய்வது வழக்கம். வட நாட்டில் நவராத்திரி பண்டிகையினை தசரா என்று அங்கு வெகு விமர்சையாக கொண்டாடுவார்கள். அந்த தசரா பண்டிகையினை தமிழகத்தில், திருநெல்வேலி அருகேயுள்ள குலசேகரப்பட்டனத்தில் மிகவும் விமர்சையாக கொண்டாடுவதை மக்கள் வழக்கமாக கொண்டுள்ளனர்.

இங்குள்ள முத்தாரம்மன் கோவிலில் தசரா திருவிழாவினை ஒவ்வொரு நவராத்திரியின் போதும் கொண்டாடுவதை அந்த ஊர் மக்கள் வழக்கமாக கொண்டுள்ளனர். பாண்டிய நாட்டை ஆண்ட குலசேகரப்பாண்டிய மன்னனுக்கு முத்தாரம்மன் காட்சி கொடுத்து அருள் வழங்கியதால் அந்த மன்னனின் பெயரால் இவ்வூர் குலசேகரப்பட்டனம் எனப் பின்னர் அழைக்
கப்பட்டது. குலசையை ஆண்ட பாண்டிய மன்னர்களுக்கும், மைசூர் பகுதியை ஆண்ட மன்னர்களுக்கும் முன்பு உறவு முறை ஏற்பட்டதாம். இதனால் தான் மைசூரில் கொண்டாடப்படும் தசரா திருவிழா குலசையிலும் கொண்டாடப்படுவதாக அங்குள்ள மக்கள் கூறுகிறார்கள்.

தூத்துக்குடியை ஒட்டியுள்ள கடலில் தாராளமாக கிடைத்த முத்துக்களை எடுத்து அதை ஆபரணங்களாக்கி பாண்டிய மன்னர்கள், இந்த அம்மனுக்கு சூட்டி அழகு பார்த்ததால் அம்பிகை முத்தாரம்மன் (முத்துக்களை அள்ளித் தருபவள்) என்று பெயர் பெற்றதாகவும் ஒரு கதை உள்ளது. மேலும் உடலில் தோன்றும் அம்மை முத்துக்கள் நீங்க, தன்னை வேண்டி வழிபடுபவர்களுக்கு குணமாக்குபவள் என்பதாலும் முத்தாரம்மன் என்று பெயர் பெற்றதாகவும் மற்ெறாரு கதைகளில் உள்ளது. இத தவிர வேறு கதைகளும் குறிப்பிடுகிறார்கள்.

முன்னொரு காலத்தில் வரமுனி என்றொரு முனிவர் வாழ்ந்துள்ளார். அவரின் வீடு வழியாக அகத்திய மாமுனிவர் வந்துள்ளார். அவரை ஆணவத் திமிரால் மதிக்கத் தவறியதோடு மட்டுமின்றி அவமரியாதையும் செய்துள்ளார். மனம் நொந்த தமிழ்ஞானி, வரமுனிக்கு எருமை தலையும் மனித உடலும் பெறுவாய் எனச் சாபமிட்டு சென்றுள்ளார். அசுரனாக மாறிய வரமுனி மூன்று உலகங்களையும் அடிமைப்படுத்தி, மகிஷாசூரன் எனப் பெயர் பெற்றான்.

அவனுடைய இடையூறுகளை  தாங்க இயலாத முனிவர்கள் அன்னையை நோக்கி வேள்வி நடத்தி கடும் தவம் புரிந்தனர். அவர்கள் நடத்திய வேள்வியால் ஒரு பெண் குழந்தை உருவில் லலிதாம்பிகை தோன்றினாள். ஒன்பது நாட்களில் பராசக்தி மறுவடிவான காளியாக மாறி மகிஷாசூரனை வதம் செய்த அந்த 10ம் நாள் தான் தசரா என அழைக்கப்படுகிறது. அரக்கனை அழிப்பதற்காக சிவபெருமானிடம் முத்தாரம்மன் சூலம் பெற்று சம்ஹாரம் செய்ததாகவும் வரலாறு உள்ளது. எனவே முத்தாரம்மன் ஏந்தி வரும் சூலத்துக்கும் சிறப்பு பூஜைகள் இங்கு நடைபெறும்.

விஜயதசமி தினத்தன்று சரியாக இரவு 12 மணிக்கு மகிஷாசூரனை வதம் செய்து பிறகு முத்தாரம்மன் தேரில் பவனி செல்வாள். தமிழ்நாட்டில் அம்பாள் தேரில் ஏறி பவனி செல்வது இந்த தலத்தில் மட்டுமே நடைபெறுகிறது. பொதுவாக நவராத்திரியின் போது எல்லா கோயில்களிலும் பத்து நாட்கள் கொலு வைப்பது வழக்கம். ஆனால் இங்கு கொலுவில் வீற்றிருக்கும் கடவுள்களின் திருவுருவங்களை வேடமணிந்து வழிபடுகின்றனர்.

10 நாட்கள் நடைபெறும் இந்த திருவிழாவில் குறவன், குறத்தி, ராஜா, குரங்கு, கரடி, மாடன், கருப்பசாமி, முருகன், கிருஷ்ணர், அம்மன், கணபதி, சிவன், பெருமாள், காளி வேடங்கள் மட்டுமில்லாமல் கிறிஸ்து, முஸ்லீம் வழிபாட்டினர் வேடங்களும் அணிந்து முத்தாரம்மனை வழிபடுகிறார்கள். இங்கு எல்லா மதங்களும் ஒன்று என்பதால், எந்தவித பாகுபாடும் இல்லாமல் நடக்கும் திருவிழா இது. 10 வருடங்களாக காளி வேடம் அணிந்து செல்லும் விஜய் இந்த விழாவைப் பற்றி விவரித்தார்.