நண்பர்களிடையே மாற்றி மாற்றிப் பேசுபவர்களை, “என்ன உன்னை கீழ்ப்பாக்கம் அனுப்பணுமா.?” என்று கிண்டலாய்க் கேட்பதைப் பார்த்திருப்போம். மனநலம் பிறழ்ந்தவர் என்றால் கீழ்ப்பாக்கம் என்று நினைப்பதற்குப் பின்னால் ஒரு மருத்துவரது வாழ்நாளே உறைந்து இருக்கிறது என்பது உங்களுக்குத் தெரியுமா.?“டாக்டர் சாரதா மேனன்”... ஆம், இந்திய மனநோயின் வரலாற்றை எழுதும்போது, இவரது பெயரில்லாமல் எழுத முடியாது.

ஆனால் இவரது வாசலில், “மனநோய் மருத்துவர்” என்ற பெயர் பலகை கூட இருக்காது. “முதன்முதலாக ஒரு மனநோயாளியை சிகிச்சைக்காக அழைத்து வரும்போது, இதுபோன்ற பெயர்ப்பலகைகள் அவர்களுக்கு பெரும் அச்சத்தையும், தயக்கத்தையும் ஏற்படுத்தக்கூடும்..” எனக் கூறும் டாக்டர் சாரதா மேனன், தனது 98 வயதில் இன்றும் தினசரி நோயாளிகளைப் பார்த்து வருகிறார்..

ஆம்..அதனால் தான் இருந்த சொற்ப பெண் மருத்துவர்களும் மகப்பேறு அல்லது குழந்தைநலம் ஆகிய துறைகளைத் தேர்ந்தெடுக்கையில் டாக்டர் சாரதா மனநோய் மருத்துவத்தைத் தேர்ந்தெடுக்கிறார்.

பெங்களூரின் நிம்ஹான்ஸ் (NIMHANS) மருத்துவமனையில் 1957ம் ஆண்டு மனநோய் மருத்துவத்தில் முதுகலைப் பட்டம் பெற்று இந்தியாவின் முதல் மனநோய் மருத்துவராக தேர்ச்சி பெற்ற சாரதா, அப்போதைய மனநோய்  மருத்துவமனைகளின் நிலையைப் பற்றி கூறும்போது, “ஒரே ஒரு நர்ஸ், ஒரே ஒரு மருந்து, ஓராயிரம் மனநோயாளிகள்” என மனநோய்க்கான மருத்துவம் ஆரம்பநிலையில் மட்டுமே காணப்பட்டதாகவும், அதனால் நோயாளிகள் பெரும் சிரமத்திற்கு ஆளானதையும் நினைவு கூறுகிறார்.

இந்த நிலையில் மன அழுத்தம், மனப் பிறழ்வு, ஸ்கிசோஃப்ரினியா, பை போலார் என அனைத்து மனநோய்களுக்கும் தனி சிகிச்சை தேவைப்படுகிறது என்பதையும், அதற்காக இந்தத் துறையில் தாம் வெகுதூரம் பயணிக்க வேண்டியிருப்பதையும் உணர்கிறார்.