ஒவ்வொரு மனிதனின் வாழ்க்கையிலும் முக்கியமானது குழந்தைப்பருவம். சிறு வயதில் நடக்கும் சம்பவங்கள் எதிர்கால வாழ்க்கையைத் தீர்மானிப்பதில் முக்கியப்பங்கு வகிக்கின்றன. குழந்தைப்பருவத்தில் நடந்த ஒரு கொடிய நிகழ்வு எப்படி ஒரு பெண்ணின் வாழ்க்கையையே புரட்டிப்போட்டது என்பதை ஆழமாக சித்தரிக்கிறது ‘அடிக்ட்டேட்’ திரைப்படம்.

அதே நேரத்தில் ஒரு விஷயத்துக்கு அடிமையாகி  மனம் போன போக்கில் செல்வதால் வாழ்க்கை எப்படியெல்லாம் திசைமாறும் என்பதையும் ஆணித்தரமாக பதிவு செய்கிறது இந்தத் திரைப்படம். அமெரிக்காவைச் சேர்ந்த ஜேன் என்ற பெண்மணி எழுதிய நாவலைத் தழுவி உருவாகியிருக்கும் இப்படத்தின் கதைக்குள் செல்வோம்.

நல்ல கணவர், இரண்டு குழந்தைகள், மாளிகை போல வீடு என வசதியான ஒரு வாழ்க்கையை வாழ்ந்து வருகிறாள் ஜோ. அவள் வேலைக்குப் போய்த்தான் சம்பாதிக்க வேண்டும் என்ற நிலையில் அவள் குடும்பம் இல்லை. இருந்தாலும் சுய விருப்பத்திற்காக ஒரு நிறுவனத்தை நடத்தி வருகிறாள்.

அது கலைஞர்களை ஊக்குவிக்கும் நிறுவனம். இதுபோக இல்லை என்று அவள் ஏக்கம் கொள்வதற்கு எதுவுமில்லை. அத்தனையும் அவளுக்குக் கிடைத்திருக்கிறது. அத்துடன் கணவனும் குழந்தைகளும் ஜோ மீது மிகுந்த அன்புடன் இருக்கிறார்கள். அவளது வீட்டினுள் மகிழ்ச்சி ததும்புகிறது. இருந்தாலும் ஜோவுக்குள் ஏதோ ஒரு போதாமை.