பல் பாதுகாப்பு குறித்து பெருமளவில் நாம் யாரும் யோசிப்பதே இல்லை. சருமத்திற்கும், தலைமுடிக்கும் கொடுக்கும் முக்கியத்துவத்தை நாம் பற்களுக்கு கொடுப்பதில்லை. காலையில் எழுந்து பல் துலக்குவதோடு அதன் பராமரிப்பு முடிந்துவிடுகிறது என்று எண்ணுகிறோம்.

இத்தகைய அலட்சியத்தாலே பல் சொத்தை, பல் வலி என பல் தொடர்பான பல்வேறு பிரச்சனைகளை சந்திக்க நேரிடுகிறது. விளைவு தாங்க முடியாத வலியை நமக்கு ஏற்படுத்திவிடுகிறது. பெரும்பாலும் வலி வந்த பிறகே மருத்துவர்களை நாடுகிறோம். பற்களை எப்படி பாதுகாப்பது? பல் சொத்தை உள்ளவர்கள் என்ன மாதிரியான சிகிச்சைகளை எடுத்துக்கொள்ள வேண்டும் என்று விளக்குகிறார் பல் மருத்துவர் டாக்டர் விவேக் நாராயணன்.

பல் முளைக்கும் தருவாயில் இருக்கும் குழந்தைகள் சிலருக்கு தாய்ப்பால் கொடுக்கும் தாய்மார்கள், பால் கொடுத்தபின் வெதுவெதுப்பான நீரில் மிருதுவான காட்டன் துணியை நனைத்து, குழந்தைகளின் தாடைகளை சுத்தப்படுத்த வேண்டும். இல்லையென்றால் பால் கட்டியாகி பற்களின் வேர்களிலே நின்று விடும்.

விளைவு இதுவே குழந்தைகளுக்கு சீக்கிரமாக சொத்தை பல் ஏற்பட காரணமாக அமைகிறது. சொத்தையான பல் விழுந்து மீண்டும் வளரக்கூடியது தானே என நினைத்து, பெற்றோர்கள் கவனக் குறைவாக செயல்பட்டால், சொத்தை வேர் வரை சென்று இளம் வயதிலேயே வேரின் ஆரோக்கியத்தை கெடுக்கிறது. அதன் மீது வளரும் பற்கள் வலுவாக இல்லாமல் வலியை ஏற்படுத்துவதோடு, விரைவிலேயே ஆடத் தொடங்குகிறது.

சாதாரணமாக இருந்தால் அதற்கு ஏற்றவாறு நவீன முறை சிகிச்சைகள் தற்போது இருக்கிறது. அதை எடுத்துக் கொள்ளலாம். பல் சொத்தையின் தன்மை அதிகரித்து வேர்வரை பாதிப்பை ஏற்படுத்தி இருந்தால் மட்டுமே ரூட் கெனால் சிகிச்சை எடுத்துக்கொள்ள வேண்டும்.

ரூட் கெனால் சிகிச்சை பெற்றவர்கள் டூத் கேப் போடுவது மிகவும் அவசியம். பெரும்பாலும் ரூட் கெனால் சிகிச்சைக்கு பதிலாக பாதிக்கப்பட்ட பல்லை எடுத்துவிட்டு பக்கத்தில் இருக்கும் பல்லின் துணையோடு வேறு பல் பொருத்துவதுதான் சிறந்த முறையாகும். அது வாழ்நாள் வரை அவர்களுக்கு எந்த பிரச்சனையும்ஏற்படுத்தாது.