வலிகளே எனது வழிகாட்டி!

சமூக வலைத்தளம், இரு பக்கமும் கூர்மையான ஆயுதம் என்பது நாம் அனைவரும் அறிந்ததே. அதை கையாளும் முறையில் தான் இருக்கிறது ஒவ்வொருவரின் வெற்றியும். அப்படி வெகுஜன மக்கள் பயன்படுத்தும் வாட்ஸ் அப் மற்றும் முகநூல் பக்கத்தை கருவியாகக் கொண்டு ஆடை விற்பனையில் சாதித்திருக்கிறார் சென்னையை சேர்ந்த சண்முகப்பிரியா.

பொருளாதாரத்தில் பின் தங்கிய குடும்பத்தில் பிறந்தாலும் கல்வி மட்டுமே ஒருவரின் வாழ்க்கை தரத்தை உயர்த்தும் என்பதில் உறுதியாக இருந்த சண்முகப்பிரியா M.S.W Hr பட்டப்படிப்பு படித்திருக்கிறார். படித்து முடித்த கையோடு வேலைக்கு சென்றவரின் வாழ்க்கையில் ஏற்பட்ட திருப்பம்தான் தற்போது அவர் நடத்திக் கொண்டிருக்கும் “யுனீக் த்ரெட்ஸ்” (Unique Threads) ஆடை நிறுவனம்.

“என்னுடைய சொந்த ஊர் திருவள்ளூர் மாவட்டம் நரசிங்கபுரம். அப்பா சாதாரண கார்பெண்டர் வேலை செய்பவர். ரொம்ப கஷ்டப்பட்டுதான் அப்பா எங்களை படிக்க வைத்தார். படித்தது எல்லாம் சென்னையில் தான். படித்து முடித்தவுடனே எனக்கு தனியார் நிறுவனத்தில் வேலை கிடைத்தது. கொஞ்ச நாள் வேலைக்கு சென்று வந்தேன்.

படித்து முடித்துவிட்டதால் வீட்டில் திருமணம் பார்த்து முடிச்சாங்க. திருமணத்திற்கு பிறகும் வேலைக்கு போவதை நான் விடவில்லை. தொடர்ந்து வந்தேன். என்னுடைய கணவரும் தனியார் நிறுவனத்தில் வேலை பார்த்து வந்தார். இருவருடைய வாழ்க்கையும் சில காலம் தனியார் நிறுவனத்தின் சம்பளத்தில்தான் ஓடிக்கொண்டிருந்தது...” நன்றாக சென்று கொண்டிருந்தவரின் வாழ்க்கையில் அதன் பிறகு தான் வலிகளை சந்திக்கத் தொடங்கி இருக்கிறார்.