பெண்களே தன்னம்பிக்கையுடன் இருங்கள்

பல்வேறு பிரச்சனைகளை  கடந்து ஒரு சில பெண்களே பல்வேறு துறைகளில்  தனக்கென தனி அடையாளத்தை  பதித்துவருகிறார்கள். பெண்கள் சிறுதொழில் செய்ய உதவுவதும், தான் நடத்தும் பள்ளியில் ஏழை மாணவர்களுக்கு  கல்வி அளிப்பதும், ஐ,ஏ.எஸ் அகாடமி நடத்துவதும் இவருடைய பணிகள். படிப்பறிவற்ற ஏழை எளிய பெண்களும் இந்த  சமுதாயத்தில் தன்னம்பிக்கையோடு வாழ முடியும் என்றும் அவர்களுக்கு தன்னால்  முடிந்த உதவிகளை செய்ய  முடியும் என்று கூறுகிறார். மதுரவாயல் பகுதியை சேர்ந்த  அகல்யா முருகானந்த் அவரிடம் பேசினேன்.

“என்னுடைய சொந்த ஊரான ராமநாதபுரத்தில் உள்ள கோழிகுளம் எனும் சின்ன கிராமம். அங்குதான் என்னுடைய  பள்ளி படிப்பை முடித்தேன். என்னுடைய அப்பா, தாத்தா இருவரும் தலைமை ஆசிரியராக இருந்தவர்கள்.  என்னுடைய  கல்லூரி படிப்பை  திண்டுக்கல் மாவட்டத்தில் படித்தேன். அதே பகுதியில் ஆசிரியர் பயிற்சியையும் முடித்தேன்.
அந்தக் கல்லூரியில் லட்சுமி என்கிற ஆசிரியர் ஒருவர் இருந்தார். அவரை மாணவர்கள் அனைவருக்கும் பிடிக்கும்.  மாணவர்களுடனான அவருடைய அணுகுமுறை, அவர்களுடைய பயிற்சி முறை என்னை வெகுவாக ஈர்த்தது.  அவரிடம்தான் ஆசிரியர் துறை என்பது சேவை துறை, கல்வி கண்ணானது அனைவருக்கும் கிடைக்க வேண்டும் என்கிற  உந்துதலை எனக்குள் உருவாக்கியது.. திருமணத்திற்கு பிறகு சென்னை வந்தேன்.