நம்மைச் சுற்றி நிகழும் சண்டைகளை கவனித்தால் பெரும்பாலும் சண்டையிடுபவர் பேசும் வசனம் ‘அவன் எலும்பை அடிச்சு நொறுக்கணும்’, ‘நெஞ்சு எலும்பை மிதிச்சிடுவேன்’, ‘பல்ல ஒடச்சி கையில கொடுப்பேன்’ என எலும்பினையும், பல்லையும்தான் நம் உடம்பில் முதன்மையாகக் கொண்டு பேசுவர். 

ஏனென்றால், உடம்பில் மிகக் கடினமான உறுப்பு பல்தான். இரண்டாவது எலும்புகள். இதனால்தான் அவ்வாறு சொல்வார்கள்.இப்படி நம் மனித உடம்பின் இரண்டாம் கடினமான உறுப்பான எலும்பினைப் பற்றியும், அதன் பயன்கள், அதில் இயன்முறை மருத்துவத்தின் பங்கு என்ன என அனைத்தையும் பற்றி இங்கே தெரிந்துகொள்வோம்.

திடமான தோற்றம் கொண்ட எலும்புகள்தான் நம் உருவத்தை, உடலை வடிவமைக்கிறது. வெறும் எலும்புக்கூட்டை மட்டும் வைத்து எந்த உயிரினம் என நம்மால் எளிதில் கண்டுகொள்ள முடியும். நம்மால் நடக்க முடிவதற்குக் காரணமும் எலும்புக்கூட்டின் வடிவமைப்பால்தான்.

வெளியே வெறும் தடிமனாகவும், ஆங்காங்கே சிறு பள்ளமும் குழியும் இருக்கும் எலும்புகளின் உள்ளே பல அடுக்குகள் உள்ளன. நம் உடம்பின் அனைத்து இடங்களிலும் (நம் முன்னங்கழுத்து உட்பட) எலும்புகள் உள்ளன.