“குடி  குடியை கெடுக்கும்” என்கிற வரி அனைவருக்கும் பரிச்சயமான ஒன்று. ஆனால், அந்த வரியை படிக்கும் நமக்கு அது எந்தவித மாற்றத்தையும் சமூகத்தில் நிகழ்த்தவில்லை என்பதுதான் மிகவும் வருத்தத்திற்குரியது.

குடி போதை மறுவாழ்வு மையத்தின் உள்ளே சென்று என்ன மாதிரியான சிகிச்சை முறைகள் அங்கே வழங்கப்படுகிறது? அந்த சிகிச்சை முறைகள் குடிநோயாளிகளுக்கு என்ன மாதிரியான நன்மைகளை அளிக்கிறது? என்ன மாதிரியான ஆபத்துகளை குடி நோயாளிகளிடம் இது உருவாக்குகிறது? இவற்றைப் பற்றியெல்லாம் தெரியுமா எனக்  கேட்டால், பலரது பதில் இங்கே தெரியாது என்பதே.

பெரும்பான்மையான குடும்பங்களில் மதுப்பழக்கத்துக்கு ஒருவராவது ஆளாகி அந்தக் குடும்பத்திற்கு உபத்திரம் கொடுக்கிற நபராய் மாறிப்போய் இருப்பார்கள். அடிக்கடி நம்மைத் தொந்தரவு செய்யும் நபர்களிடம் இருந்து ஓடி, ஒளிந்து, தன்னைத்தானே பாதுகாத்துக் கொள்ள இன்றைய மக்கள் சில இடங்களை நாடுகின்றனர். 

இன்றைய கால சூழலில் எவ்வளவு பணம் செலவானாலும், அம்மாதிரியான இடங்களுக்கு கொண்டு சேர்க்கிற மனநிலைக்கு குடும்ப உறுப்பினர்கள் வந்துவிட்டார்கள் என்று சொல்லலாம். ஏனெனில் இந்த மாதிரியான குடும்பங்களில் உள்ளவர்களின் வாழ்க்கை எப்போதும் பதட்டத்துடனும், பரபரப்புடனுமே  எப்போதும் நகர்கிறது.

இவை ஓரிரு நாட்களுக்கான கதையாக இல்லாமல், வருடக் கணக்கில் தொடரும் போது, இந்தக் குடிமகன்களால், குறிப்பிட்ட குடும்பத்திற்கான அடிப்படை மரியாதை கிடைக்காமலே போய்விடுகிறது. 

மேலும் குடிமகன்கள் வேலைக்கே போகாமலும், தங்கள் உழைப்பை குடும்பத்திற்கான வருமானமாகச் செலுத்தாமலும், பொறுப்பற்ற நபராக வீட்டில் உட்கார்ந்து, என் நேரமும் குடிபோதையில் இருப்பதை பார்க்கும் போது, ஒவ்வொரு குடும்பமும் மனதளவில் நொறுங்கித்தான் போய்விடுகிறது.