சிறுநீரகக் கற்கள் என்பது சிறுநீரகத்தின் உள்ளே உருவாகும் கனிமங்கள், உப்பினால் ஆன கடினமான படிவுகள். சிறுநீர்ப்பை உட்பட சிறுநீரக மண்டலத்தின் எந்தப் பகுதியையும் இந்தக் கற்கள் பாதிக்கலாம்.

சில கற்கள் சிறுநீரகத்தில் தங்கி எந்த பிரச்சனையையும் ஏற்படுத்தாது. சில சமயங்களில் சிறுநீரகக் கல் சிறுநீர்க்குழாய் வழியாக சிறுநீர்ப்பைக்குச் சென்று சிறுநீருடன் சேர்ந்து வெளியேறும். சிறுநீர்க்குழாயில் கல் இருந்தால், அது சிறுநீர் பாதையை அடைத்து வலியை ஏற்படுத்தும். சிறுநீரகக் கற்களின் பொதுவான அறிகுறிகள் சுருக்கென்ற முதுகுவலி, அடிவயிற்றில் வலி அல்லது சிறுநீரில் ரத்தம் வெளியேறுதல் போன்றவை.

கால்சியம் ஆக்சலேட் மட்டுமே சிறுநீரக கல்லாக மாறுகிறது என்று பெரும்பாலானோர் நினைக்கிறார்கள். இது ஒரு பொதுவான வகை. ஆனால், ஸ்ட்ருவைட், யூரிக் அமிலம், சிஸ்டைன் கற்களும் சிறுநீரகத்தில் சேரக்கூடும். நாம் உண்ணும் உணவில் இயற்கையாகக் காணப்படும் ஆக்சலேட், சிறுநீரில் உள்ள கால்சியம் ஆகியவற்றின் கலவையிலிருந்து கால்சியம் கற்கள் உருவாகின்றன.

சிறுநீர் பாதை நோய்த்தொற்றுகளின் தொடர்ச்சியாக ஸ்ட்ரூவைட் கற்கள் உருவாகின்றன. இது சிறுநீரகத்திற்குள்ளேயே பெரிதாகலாம். இறைச்சியை அதிகம் சாப்பிடுபவர்களுக்கு யூரிக் ஆசிட் கற்கள் அதிகம் வரும். சிஸ்டைன் கற்கள் சிஸ்டினுரியா எனப்படும் பரம்பரைக் கோளாறால் ஏற்படுகிறது, இதில் சிறுநீரகம் அதிக அளவு அமினோ அமிலத்தை வெளியேற்றுகிறது.