தனியார் பள்ளிகள்தான் தரமான கல்வியைக் கொடுக்க முடியும், அங்கு படித்தால் தான் அதிக மதிப்பெண் பெற முடியும் என்பது பெரும்பாலான பெற்றோர்களின் நம்பிக்கையாக உள்ளது. அதற்காக கேட்ட பணத்தைக் கொட்டிக் கொடுத்து குழந்தைகளைத் தனியார் பள்ளிகளில் சேர்க்கிறார்கள்.

தரமான பள்ளிகள் என்றும் உலகத் தரமான கல்வி தரப்படுகிறது என்றும் நம்பப்படுகின்ற தனியார் பள்ளிகளில் நடைபெற்றுள்ள மிகப்பெரிய முறைகேடு தற்போது வெளிச்சத்திற்கு வந்துள்ளது. 2017-18 ஆம் கல்வியாண்டில் +1 பொதுத் தேர்வில் தேர்ச்சி பெறாத 28,167 மாணவர்களை மாற்றுச் சான்றிதழ் கொடுத்து தனியார் பள்ளிகள் வெளியேற்றியுள்ளது என்பதுதான் அது.

‘‘கடந்த 2018 மார்ச் மாதம் முதன்முதலாக நடத்தப்பட்ட +1 பொதுத் தேர்வை 8 லட்சத்து 61 ஆயிரத்து 915 மாணவர்கள் எழுதினர். தேர்ச்சி விகிதம் 91.3% ஆக இருந்தது. +1 வகுப்பில் தோல்வி அடைந்தாலும் தொடர்ந்து +2 வகுப்புக்குச் செல்லவும்; தோல்வியடைந்த பாடங்களை மட்டும் ஜூன் மாத சிறப்புத் தேர்வு அல்லது +2 வகுப்பு இறுதித் தேர்வின்போது சேர்த்து எழுதவும் வாய்ப்பு வழங்கப்பட்டது.

இந்த வாய்ப்பைப் பயன்படுத்தி மாணவர்களை +1 வகுப்பில் தேர்ச்சி அடையவைக்க முயற்சி செய்யாமல் தனியார் பள்ளிகள் தோல்வியடைந்த மாணவர்களுக்கு மாற்றுச் சான்றிதழ் கொடுத்துள்ளது கல்வி உரிமை மீறல் குற்றமாகும். தனியார் பள்ளிகள் தங்கள் விருப்பம்போல் எதை வேண்டுமானாலும் செய்வதை இதுவரை கல்வித்துறை கண்டுகொள்ளாமல் விட்டதே இதற்குக் காரணம்.  

மேலும் தொடர்ந்த அவர், ‘‘பதினைந்து ஆண்டுகளுக்கும் மேலாக +2 பாடங்களை மட்டும் இரண்டு ஆண்டுகள் நடத்தியதை கல்வித்துறை கண்டுகொள்ளாமல் விட்டதைப்போல இந்தத் தவறையும் கல்வித்துறை கண்டுகொள்ளாது என்பதால் இதைச் செய்திருக்கிறார்கள்.

+1 பாடங்களை நடத்தாததால் பொறியியல் பட்டப் படிப்பில் பெரும்பாலான மாணவர்கள் அண்ணா பல்கலைக்கழகத் தேர்வுகளில் தோல்வி அடையும் நிலை ஏற்பட்டது. இதன் விளைவாக அண்ணா பல்கலைக்கழகம் போன்றவை வலியுறுத்தியதால் +1 வகுப்புக்குப் பொதுத் தேர்வு நடத்தும் முறையை பள்ளிக்கல்வித்துறை அறிவித்தது.

இந்த அறிவிப்பும் உயர்கல்வியின் தரம் குறையவே வழிவகுக்கும். ‘அகில இந்திய அளவிலான போட்டித் தேர்வுகளில் தமிழக மாணவர்கள் பின்னடைவை சந்திக்கும் நிலையை உருவாக்கும்.’’ ‘‘கடந்த ஆண்டில் கேரள மாநிலத்தின் +2 தேர்ச்சி விகிதம் 83.75% என்றும், ஆந்திர மாநிலத்தின் தேர்ச்சி விகிதம் 73.33% என்றும் உள்ளது.

ஆனால், அகில இந்திய அளவில் நடைபெறும் நீட் மற்றும் ஐ.ஐ.டி போன்ற நுழைவுத் தேர்வுகளில் இம்மாநில மாணவர்களை விட தமிழக மாணவர்கள் மிகக் குறைவானவர்களே தேர்ச்சி பெறுகின்றனர். தமிழக மாணவர்களை 90 சதவிகிதத்திற்கும் அதிகமாக +2 தேர்வில் தேர்ச்சி அடைய வைப்பதால் மாணவர்களுக்கு ஒரு பயனும் இல்லை.

நாட்டில் உயர்கல்வி கற்பவர்களின் எண்ணிக்கை அதிகரித்து வருகிறது என்று பெருமைப்படுகிறோம்.  நாடு தழுவிய அளவில் உயர்கல்விக்குச் செல்லும் மாணவர்களின் சதவீதம் 23.6 ஆக உள்ள நிலையில், தமிழகத்தில் உயர்கல்விக்குச் செல்லும் மாணவர்களின் சதவீதம் 48.9 ஆக உள்ளது.

ஆனால், உயர்கல்வியை முடிப்பவர்களில் 53 விழுக்காட்டினர் வேலை வாய்ப்பற்றவர்கள், 5 விழுக்காட்டினரே பணியாற்றும் தொழிற்திறமை வாய்ந்தவர்கள் என்று நிதி ஆயோக் அறிக்கை கூறுகிறது. ஆங்கில வழி குருட்டு மனப்பாட மதிப்பெண் கல்வியினாலும் தனியார் வணிகர்களின் கைகளில் ஒப்படைக்கப்பட்ட கல்வியினாலும் விளைந்த மிகப் பெரிய கேடு இது’’ என்று வேதனையை வெளிப்படுத்தினார் மூர்த்தி.