‘‘வாயுள்ள பிள்ளைதான் பொழைக்கும்ங்கிற பழமொழியை நீ நம்பலையா... எப்பலேர்ந்து?’’
‘‘நம்ம பிரதமரைப் பார்த்ததுலேர்ந்து!’’

‘‘மன்னா! உங்களை மாதிரியே தான் ரூபாயும்...’’
‘‘எப்படி அமைச்சரே..?’’
‘‘அதற்கும் மதிப்பு குறைந்து கொண்டே வருகிறது!’’

பட்டுப் பூச்சியில இருந்து பட்டு எடுக்கலாம். கம்பளிப் பூச்சியில இருந்து கம்பளி எடுக்க முடியுமா?
- பட்டுன்னு யோசிச்சு சட்டுன்னு தத்துவம் சொல்வோர் சங்கம்

பஸ் கெட்டவன் மாதிரி பல ரூட்ல போகும். ஆனா ரயில் நல்லவன் மாதிரி ஒரே ரூட்லதான் போகும்!
- ரயில் எஞ்சின் டிரைவரிடம் லிஃப்ட் கேட்போர் சங்கம்

‘‘நம்ம தலைவர்தான் எந்த ஊழலும் செய்யவில்லையே... எதுக்கு அவரை சி.பி.ஐ அதிகாரிகள் விசாரிச்சிட்டு இருக்காங்க?’’
‘‘எந்த ஊழலும் செய்யாம எப்படி கட்சி நடத்துறார்னு சந்தேகம் வந்திருக்காம்..!’’

‘‘ஆனாலும் அந்தக் கட்சியில பண்றது ரொம்ப ஓவர்...’’
‘‘ஏன்... என்னாச்சு?’’
‘‘இன்னோவா கார்கள் ஸ்டாக் உள்ளவரை மட்டுமே கட்சியில் சேர்த்துக்கொள்ளப்படுவார்கள்னு கட்சி ஆபீஸ் வாசல்ல போர்டு வச்சிருக்காங்க!’’

‘‘தலைவர் இன்னும் சினிமாவை மறக்கலைன்னு எப்படிச் சொல்றே..?’’
‘‘கட்சியோட கோஷ்டி சண்டையைக் கூட ஸ்டன்ட் மாஸ்டரை வச்சு நடத்தணும்ங்கறாரே..!’’