மூன்றாயிரம் ஆண்டுகள் தொன்மை வாய்ந்தது தமிழிசை. செழுமையான பண்களும், கம்பீரமான சுரங்களும் கொண்ட நம் இசையின் கூறுகள், ‘கர்நாடக இசை’ என்ற பெயரில் இன்று அந்நியமாகி விட்டன. காரணம், தமிழிசையை வளர்த்தெடுக்கப் போதுமான கருவி நூல்கள் இல்லாததே. 500 ஆண்டுகள் சரித்திரமே கொண்ட ஆங்கில இசைக்கு பாகம் பாகமாக அகராதிகளும் வரலாறுகளும் என்சைக்ளோபீடியாக்களும் குவிந்து கிடக்கின்றன. தமிழிசைக்கோ அப்படியான எந்த விரிவுநூல்களும், கருவி நூல்களும் இல்லை. பல நூற்றாண்டுகளாக நிலவிவந்த இந்தக் குறையை கடும் உழைப்பின் மூலம் போக்கியுள்ளார் மதுரையைச் சேர்ந்த இசையறிஞர் மம்மது!


‘‘இன்றைக்கு கர்நாடக சங்கீதம் என்று சொல்லப்படுவது முழுக்க முழுக்க தமிழிசைதான். ‘கர்நாடகம்’ என்ற சொல்லாடலே 300 வருடங்களுக்கு முன் வந்ததுதான். ஆனால், தமிழிசை 3 ஆயிரம் வருடங்கள் பழமையானது. கர்நாடகம் என்றால், ‘பழமையானது’ என்று ஒரு பொருள் உண்டு. ‘சுத்த கர்நாடகமா இருக்கியே...’ என்று பழமை விரும்பிகளைத் திட்டுவார்கள்.விந்திய மலைக்குத் தெற்கே உள்ளே பகுதிகள் அனைத்துக்கும் ‘கர்நாடகம்’ என்று ஒரு பெயர் உண்டு. திருமறைக்காடு வேதாரண்யமாக ஆனதுபோல, குரங்காடுதுறை கபிஸ்தலமாக மாறினதுபோல, நம்முடைய இசை திருடு போய்விட்டது. கர்நாடக இசைங்கிறது, தமிழிசைக்குத் தொடர்பில்லாததுன்னு சொல்லி ஒரு இசை அரசியலே இங்கே நடக்குது. அது முற்றிலும் பொய். அதை தகர்க்கிறதுக்கான நீண்ட போராட்டம் தேவை. அதற்கான ஒரு ஆயுதம்தான் இந்த இசைப் பேரகராதி’’ என்கிறார் மம்மது. (தமிழிசைப் பேரகராதி கிடைக்குமிடம்: இன்னிசை அறக்கட்டளை, இன்னிசை இல்லம், 7&12/28, பனையடியான் கோவில் தெரு, மகாத்மா காந்தி நகர், மதுரை&625014. விலை ரூ.500.)‘‘ஐரோப்பியர்கள் இன்னைக்கு உலகத்தோட முன்மாதிரி மனிதர்களா இருக்கக் காரணம், அவங்க கண்டுபிடிச்ச கருவிகள், அடுத்து, அவங்க எழுதின கருவி நூல்கள். ஒரு துறையை வளர்த்தெடுக்க கருவி நூல்கள் அவசியம். ‘முத்தமிழ்’னு வாய்நிறைய பேசுறோம்.