தனியே... தன்னந்தனியே ஓர் உருவம் அமர்ந்திருக்கிறது. அது ஆணாகவோ, பெண்ணாகவோ இருக்கலாம். அருகில் ஒருவர்கூட இல்லை. யாருடனும் பேசவில்லை. இருந்தாலும் அந்த உருவம் சிரிக்கிறது. கொஞ்சம் அமைதியாகப் பார்க்கிறது. 

அதிகபட்சம் ஆட்காட்டி விரல் மட்டும் வெற்றிலை மீது சுண்ணாம்பைத் தடவுவது போல, ஸ்மார்ட்போனைத் தடவிக்கொண்டிருக்கிறது. காதில் வழக்கம்போல செயற்கை உறுப்பாய் ஒரு ஹெட்போன். ‘‘யோவ்... என்னத்தயா பாத்து இப்படி சிரிக்கிறாங்க...’ என அவரது போனை எட்டிப் பார்த்தால்... அங்கே அவர் பார்த்துக் கொண்டிருப்பது ரீல்ஸ்.. ரீல்ஸ்.. ரீல்ஸ்..!

அலைக்கம்பத்தை ஆட்டி, ஆட்டி அலைவரிசையை சரி செய்த காலத்தை மறக்க முடியாது. வீட்டுக்கு உறவினர்கள் வந்தால், வாடகைக்கு டெக், வீடியோ கேசட் வாங்கி, பிடித்த திரைப்படங்களைப் பார்த்து மகிழ்ச்சியடைந்தோம். இன்று தமிழ் ராக்கர்ஸில் பதிவிறக்கம் செய்து பார்த்து, கேமரா பிரின்ட், ஒரிஜினல் பிரின்ட் என்று சொல்லும் விஷயமெல்லாம் அன்றே கிடைத்த அற்புதங்கள். 

வீட்டில் அனைவரும் வெளியே சென்ற நேரத்தில், தெரு உறங்கியதும், டெக், கேசட் வாங்கி பூனையை விட மெல்லிய சத்தத்தில் நண்பர்களோடு வீட்டுக்குள் சென்று ‘அந்த படம்’ பார்த்த நாட்களையும் மறக்க முடியாது. 

காலச் சக்கர முள்ளை நிகழ்காலத்துக்குக் கொண்டு வருவோம். தொண்ணூறுகளில் கம்ப்யூட்டர் வந்ததே ஒரு புதிய அனுபவமாக இருந்தது. உள்ளங்கையில் ஒரு ஆண்ட்ராய்டு போன் அழகாய் அமர்ந்து கொண்டு, உலகையே ஆட்டிப்படைக்கப் போகிறது என்பதை அப்போது யாருமே அறிந்திருக்க மாட்டார்கள். 

அன்று பயாஸ்கோப்பை உருட்டி, உருட்டி ரீல்ஸ் பார்த்து மகிழ்ந்தோம். இன்று இணையதளங்களில் ரீல்ஸ் என்ற மாய வலையில் சிக்கிக்கொண்டு, பலர் தங்களது வாழ்க்கையைத் தொலைத்துக் கொண்டிருக்கின்றனர். வியூஸ் (Views) எனும் பார்வைகளை மையப்படுத்தி வரும் ரீல்ஸ், பலபேரின் வாழ்வாதாரத்தை உயர்த்திக் கொண்டிருப்பதையும் மறுக்க முடியாது. 

அதேநேரம் ரீல்ஸைப் பார்த்துக்கொண்டே பொழுதைக் கழித்துக்கொண்டு, கல்வி, வாழ்வின் அடுத்த நிலை, குடும்பம், குழந்தைகளைக் கவனிக்காமல் பலர் வாழ்ந்து கொண்டிருப்பது கவலை யளிக்கும் விஷயம்.இன்ஸ்டாகிராமின் ஓர் அங்கம்தான் இந்த ரீல்ஸ். அதிகபட்சமாக 60 நொடிகள் வரையிலான வீடியோக்களை ரீல்ஸாக பதிவிடலாம். 

ஓட்டலில் உணவு, புதிய திரைப்படம், பொழுதுபோக்கு அம்சங்கள், கோயில், அருவி என செல்லும் ஒருவர், அங்கு பல நிமிடங்களில் செங்குத்தான முறையில் எடுக்கும் வீடியோக்களை, ஒரே நிமிடத்தில் சினிமா எடிட்டரை விட படு ஸ்பீடாய் எடிட் செய்கிறார். அதன்பின் அவரே டப்பிங் பேசுகிறார். 

சில நேரங்களில் திரையிசைப் பாடல்களையும் பின்னணியில் ஒலிக்க விடுவதுண்டு. அவ்வளவுதான், அதை இன்ஸ்டாகிராமில் ரீல்ஸாக பதிவிடுகிறார். இதையே சிலர் யூடியூப் களில் வீடியோக்களாக பதிவிடுவதும் உண்டு. சப்ஸ்கிரைபர்கள், ஃபாலோயர்ஸைப் பொறுத்து பார்வைகள் கூடிக்கொண்டே போகும். 

யூடியூப்பில் பிடித்த வீடியோ என்றால் சப்ஸ்கிரைப் செய்வார்கள். நிறைய பேருக்கு பிடித்துவிட்டால் டிரெண்டாக்கிவிடுவார்கள். பிறகு நினைத்ததை எல்லாம் ரீல்ஸ் ஆக்கலாம். பார்வைகளைப் பொறுத்து உங்கள் கணக்கில் பணம் கொட்டோ கொட்டென்று கொட்டும். ஒரு நிமிட வீடியோவில் ஒரு கோடி  சம்பாதிக்கும் வித்தையைக்கற்றுத் தருகிறது ரீல்ஸ்.

என வாயசைத்து ரீல்ஸை பதிய விடுகின்றனர். இப்பாடலில் நிஜமாகவே நடித்த நடிகர்களைக் காட்டிலும், ரீல்ஸில் காட்டும் முகபாவங்கள் மிரள வைக்கிறது. ‘எப்புடிரா...’ என வியக்க வைக்கிறது. இதுபோன்ற பல பாடல்களை ஓட விட்டு, ரொமான்ஸ்களைச் சிதறவிடுகிறது இளைஞர் படை. இதைப் பாராட்டும் பெண்களே இவர்களுக்கு இலக்கு.

சாட்டிங்கில் ஆரம்பிக்கும் பழக்கம் மெல்ல மெல்ல காதலாக மாறுகிறது. யார்?, எவர்? என்று  தெரியாமல் காதல் வலையில் விழுந்து விடும் பெண்கள், பின்னால் அனுபவிக்கும் துயரங்கள் சொல்லி மாளாது.ஆண்கள் மட்டும்தான் ரீல்ஸ் போடுவாங்களா... நாங்களும் சளைத்தவர்கள் இல்லையென பெண்களும் களமிறங்கி மிரள வைக்கின்றனர்.