கன்னடத்தில் இருந்து வெளியான படங்களில் இந்த வருடம் பார்க்கப்பட்ட படங்களை பட்டியல் எடுத்தால் அதில் ‘காந்தாரா’வுக்கு தனியிடம் இருக்கும்.அதே சமயம் இன்னொரு படமும் நிச்சயம் லிஸ்ட்டில் இருக்கும். 

அதுதான் ‘மேக்ஸ்’. ஓர் இரவில் நடக்கும் திரைப்படம், ஒரு போலீஸ் ஸ்டேஷன், விறுவிறுப்பாக பரபரப்பாக கொண்டு சென்றிருப்பார் இயக்குநர் விஜய் கார்த்திகேயா. அறிமுக இயக்குநரான இவரை நம்பி நடிக்க ஒப்புக் கொண்டவர், கன்னட டாப் நடிகரான கிச்சா சுதீப். இந்தக் கூட்டணி ஒரு படத்துடன் நிற்கவில்லை, தொடர்ந்து இரண்டாவது முறையாக விஜய் கார்த்திகேயா இயக்கத்தில் கிச்சா சுதீப் நடிப்பில் இப்போது ‘மார்க்’ வெளியாகிறது.

அசிஸ்டென்ட் டைரக்டரா பல இயக்குநர்கள்கிட்ட வேலை செய்திருக்கேன். பார்த்திபன் சார், பேரரசு சார் கூட நிறையபடங்கள் வொர்க் பண்ணியிருக்கேன். அப்பா நடராஜ் கவர்மெண்ட் பணியாளர், 10 வருடங்கள் முன்பு இறந்துட்டார். 

அம்மா, நான், உடன் என் மனைவி கலைவாணி,  மற்றும் பாப்பா ஆராதனா. இதுதான் என் குடும்பம்.என் மனைவி கொடுத்த முழு சப்போர்ட்லதான் இப்ப இங்க நிற்கிறேன். 10 வருடங்களா முதுகெலும்பா இருக்காங்க என் மனைவி. 20 வருடங்கள் காத்திருப்பு. நிறைய தேடல். அதற்குப் பலனா கிடைச்சதுதான் ‘மேக்ஸ்’ படம்.

சுதீப் சார் கதை கேட்கும் ஸ்டைலே தனி. முதல்ல நம்மை முழுமையா கவனிப்பார். நாம எப்படி அவர்கிட்ட பேசறோம், நம் மேனரிசம் என்ன, இதையெல்லாம் வைச்சு நம்மை முழுமையா ஸ்கேன் செய்துடுவார்.அப்படி நான் கதை சொல்லப் போனப்ப கதையை கேட்டுகிட்டே என்னையும் ஆராய்ந்தார். என்னவோ தெரியல... அவருக்கு என்னை ரொம்ப பிடிச்சிடுச்சு. 

சுதீப் சாருடன் சந்திப்பு தாணு சார் மூலமாதான் சாத்தியமானது. சுதீப் சார் வெறும் படம் மட்டும் நடிக்கிறதா இருந்தா பரவாயில்ல. அவர் ஒரு ரியாலிட்டி ஷோ ஹோஸ்ட். அவருக்கு நேரம் ரொம்ப முக்கியம். 

பொதுவா எல்லா பெரிய ஸ்டார் படங்களையும் குறைந்தது ஒரு வருடம் எடுப்பாங்க. ஆனா, நாங்க வெறும் நான்கு மாதங்கள்ல படத்தை முடிச்சிட்டோம். 

கூடவே யோகி பாபு சார், ‘வணங்கான்’ ரோஷினி, தீப்ஷிகா, டிராகன் மஞ்சு, கோபாலகிருஷ்ண தேஷ்பாண்டே ஆகியோரையும் சேர்த்துக்குங்க.குரு சோமசுந்தரம் சார் கேரக்டரும், நவீன் சந்திராவின் பத்ரா கேரக்டரும் அதிகமா பேசப்படும்னு நம்பறேன். இதுவரையிலும் பார்க்காத குரு சோமசுந்தரம் சாரை இந்தப் படத்தில் பார்க்கலாம்.

நவீன் சந்திரா மற்றும் குரு சோமசுந்தரம் சார்ஸ் இந்தப் படம் வழியா கன்னடத்துல அறிமுகமாகறாங்க. யோகி பாபு சாருக்கும் முக்கியமான கதாபாத்திரம். பல இடங்களில் யோகி பாபு சாருக்காக சுதீப் சார் காத்திருந்தார். அந்த அளவுக்கு யோகி பாபு சார் பயங்கர பிஸி. அந்தளவுக்கு கலைஞர்கள் திறமையை மதிக்கக் கூடியவர் சுதீப் சார்.

டெக்னிக்கல் டீம்ல நான் யாரையும் மாற்றவே இல்லை. தயாரிப்பு சத்ய ஜோதி ஃபிலிம்ஸ். இவங்க பேனர்ல இரண்டாவது படம். அதுவே பெருமையா இருக்கு. ‘மேக்ஸ்’ல இருந்த அத்தனை பேரும் இந்தப் படத்திலும் இருக்காங்க. இசை, அஜினீஸ் சந்திரசேகர். ‘காந்தாரா’வுக்கு மியூசிக்கும் இவர்தான். 

‘மேக்ஸ்’ போலவே ‘மார்க்’குக்கும் இவர் இசை பலம். இந்தப்படத்திலும் பாடல்கள் வெளியாகி ஹிட்டாகி இருக்கு. பேக்ரவுண்ட் ஸ்கோர் மாஸா கொடுத்திருக்கார். சினிமாட்டோகிராபி சேகர் சந்துரு. ‘மேக்ஸ்’ படத்திற்கு கொடுத்ததை விட பிரம்மாண்டமான விஷுவல்ஸ் கொடுத்திருக்கார். எடிட்டர் எஸ்.ஆர்.கணேஷ் பாபு. நீண்ட நாள் நண்பரான இவர், ‘மேக்ஸ்’ல அறிமுகமானார். ‘மார்க்’லயும் கைகோர்த்திருக்கார். 

ஏன் தமிழ் நடிகருக்கு படம் இயக்கலைனு கேட்கிறாங்க. உண்மையாவே எல்லா நடிகர்களுடனும் மொழி கடந்து வேலை செய்யணும் என்பதுதான் ஒரு படைப்பாளியாக என்னுடைய கனவு. 

ஏதாவது ஒரு நல்ல வாய்ப்பு கிடைச்சா போதும்னு தேடலில் இருந்தப்ப, தானாக வந்து கதவை தட்டிய வாய்ப்புதான் ‘மேக்ஸ்’. எப்படி அப்படி ஒரு வாய்ப்பை என்னால் இழக்க முடியும்? இப்ப ‘மார்க்’. இந்தப் படம் வெளியானபிறகுதான் அடுத்த படம் பற்றி யோசிக்க முடியும். 

‘மார்க்’ அதிரடி ஆக்‌ஷன் மட்டுமில்லாம குடும்பங்களுக்கான உணர்வு சூழ்ந்த பொழுதுபோக்கு கதை. தியேட்டருக்கு வரும் சுதீப் சாரின் ரசிகர்களை நூறு சதவிகிதம் திருப்திப்படுத்தும். படம் பார்த்துட்டு சொல்லுங்க.