ஆமாம். உலகில் முதல்முறையாக சீனாவில் உறுப்பு மாற்று அறுவை சிகிச்சை மூலம் பன்றியின் கல்லீரல் ஒருவருக்குப் பொருத்தப்பட்டு, அவர் 171 நாட்கள் உயிருடன் வாழ்ந்த அதிசயம் மருத்துவத் துறையில் பேசுபொருளாகி இருக்கிறது.இந்நிலையில் உறுப்பு மாற்று அறுவை சிகிச்சையில் ஒரு புதிய மைல்கல்லை எட்டியுள்ளதாக உலக மருத்துவர்கள் மெச்சுகின்றனர். 

இதனால், 11 மாத வயதுடைய பன்றியிலிருந்து மரபணு மாற்றப்பட்ட கல்லீரலை மாற்று அறுவை சிகிச்சை செய்ய மருத்துவர்கள் முடிவெடுத்துள்ளனர். 

ஏற்கனவே மரபணு மாற்றப்பட்ட பன்றியின் சிறுநீரகங்கள் மற்றும் இதயங்களை மனிதர்களுக்கு மாற்று அறுவை சிகிச்சை செய்வதில் விஞ்ஞானிகள் ஆரம்பகால வெற்றியைப் பெற்றுள்ளனர். பின்னர் மூளைச்சாவு அடைந்த ஒருவருக்கு பன்றியின் கல்லீரலை பொருத்தி சோதித்துள்ளனர். 

பன்றியின் கல்லீரல் மனித உடலுடன் பொருந்தக்கூடிய தன்மையை அதிகரிக்க மரபணு ரீதியாக வடிவமைக்கப்படுவதே மரபணு மாற்றப்பட்ட கல்லீரல். முதலில் ஜீன் எடிட்டிங் மூலம் மனித நோய் எதிர்ப்பு மறுமொழியைத் தூண்டும் பன்றியின் மரபணுக்கள் அகற்றப்படுகின்றன. 

பிறகு மனிதனின் மரபணு, பன்றியின் மரபணுவுடன் சேர்க்கப்படுகிறது.இந்த 71 வயது நோயாளியின் அறுவை சிகிச்சையில் மருத்துவர்கள் நோயெதிர்ப்பு நிராகரிப்பு மற்றும் தொற்று அபாயங்களைக் குறைக்க பத்து மரபணு திருத்தங்களுடன் மரபணு மாற்றப்பட்ட பன்றியின் கல்லீரலைத் தேர்ந்தெடுத்தனர். 

பிறகு அவரின் உடலுக்கு, வெளி உறுப்பை ஏற்றுக்கொள்ளும் வகையிலான நோயெதிர்ப்புத் தடுப்பு மருந்துகள் வழங்கப்பட்டன. மருத்துவர்களும் நோயாளியின் கல்லீரலில் இருந்த கட்டியை வெற்றிகரமாக அகற்றினர். தொடர்ந்து நோயாளியின் மீதமுள்ள கல்லீரல் பகுதியுடன் பன்றியின் கல்லீரலை இணைத்தனர்.

உடனே பித்தநீர் ஓட்டமும், கல்லீரல் செயல்பாடும் மேம்பட்டு இருப்பதைக் கண்ட மருத்துவர்கள் உற்சாகமடைந்தனர். ஆரம்பத்தில் பன்றியின் கல்லீரலின் செயல்பாடு நன்றாக இருந்ததுடன் வீக்கத்தின் அறிகுறிகளோ, கடுமையான நிராகரிப்பு அறிகுறிகளோ இருக்கவில்லை.

அல்ட்ராசவுண்ட் பரிசோதனைகளும் இயல்பான ரத்த ஓட்டத்தை உறுதிப்படுத்தின. இருப்பினும் 25வது நாளில் நோயாளியின் இதய அழுத்தத்தில் மாறுபாடுகள் உண்டாகின. சில சிக்கல்களும் ஏற்பட்டன. 

இந்நிலையில் 38 நாட்கள் வரை பன்றியின் கல்லீரலுடன் உயிர் வாழ்ந்தார் அந்த நோயாளி. இந்நேரம் நோயாளியின் சொந்த கல்லீரல் போதுமான அளவு செயல்பாட்டைப் பெற்றிருந்தது. இதனால், பன்றியின் கல்லீரல் 38வது நாளில் அகற்றப்பட்டது. பிறகு 171 நாட்கள் கழித்து அந்த நோயாளி இரைப்பை குடல் ரத்தப்போக்கு காரணமாக இறந்துபோனார்.