‘‘‘அழகான குயில்கள் மட்டும்தான் குரல் எடுத்துப் பாட முடியும் என்றால், காடு நிசப்தமாகிவிடும். ஒரு காடு, காடாக இருக்க அங்கே இருக்கிற ஒவ்வொரு உயிரினமும் தன்னாலான செயல்பாடுகளைச் செய்துகொண்டே இருக்கும். 

அப்படித்தான் நாமும், நாம் இருக்கும் இந்தச் சினிமா உலகத்தில் நம்மால் என்ன முடியுமோ அதைச் செய்யணும்...’ இதுதான் என்னுடைய குருநாதர் பாலு மகேந்திரா சார் எனக்கு சொன்ன பாடம்...’’உற்சாகமாகப் பேசுகிறார் கண்ணா ரவி. 

‘கைதி’ அஜாஸ் அகமத், ‘மண்டேலா’ மதி, ‘சாணி காயிதம்’ மாரி, ‘ரத்த சாட்சி’ அப்பு, ‘லவ்வர்’ மதன்... என ஒவ்வொரு கட்டமாக தன்னுடைய நடிப்பில் பல பரிமாணங்களைக் காட்டிக்கொண்டே இருக்கிறார்.இப்போது ‘கூலி’ அர்ஜுன் (நாகார்ஜுனாவின் மகன்) என ட்ரெண்டிங்கிலும் இருக்கிறார் கண்ணா ரவி. ‘காக்கி ஸ்குவாட்’, ‘வேடுவன்’ என அடுத்தடுத்து படங்களில் பிசி.

நடிப்புக்காக தேடலில் ஓடிக்கொண்டிருக்கும் போது நம்ம கூடவே ஒரு குருப் ஃபிரண்ட்ஸ் அவங்களுடைய திறமையை மையமாக வைத்து ஓடிட்டு இருப்பாங்க. அப்படிதான் லோகேஷ் ப்ரோ. 

எல்லாத்திலும் ஓர் அழகு இருக்கு. அதை நாம் எப்படிப் பார்த்து வெளிய கொண்டு வர்றோம் என்பதில்தான் ஒரு கலைஞனுடைய திறமை அடங்கியிருக்கு.  ஒருவருடைய குறையைக் கூட அழகாக மாற்றக்கூடிய இயக்குநர் அவர். என்னுடைய வாழ்க்கையையே பாலுமகேந்திரா சாருக்கு முன் - பின் என இரண்டாகப் பிரிக்கலாம். 

அவர் என்னுடைய வாழ்க்கைக்குள் வந்தபிறகு மொத்தமாகவே லைஃப் மாறிடுச்சு. ஒருசில சீனியர்களைப் பார்த்துதான் நாம ஒரு துறையையே தேர்வு செய்வோம். சொல்லப்போனா ஒரு துறை மீதான ஆர்வத்தை உண்டாக்கும் உந்து சக்தியே அவங்கதான். 

சொல்லிக் கொள்கிற மாதிரி, என்னை அடையாளப்படுத்துகிற மாதிரி எத்தனையோ கதாபாத்திரம் செய்தாச்சு. கதாநாயகனாகக் கூட ‘ரத்த சாட்சி’ உள்ளிட்ட படங்களில் நடிச்சிட்டேன். ஆனாலும் இன்னமும் ஏதோ ஒரு தடை இருக்கு. எடுத்த எடுப்பில் பண அடிப்படையில் நான் ஸ்ட்ராங்கா இருக்கேனா என்கிற கேள்வி இருக்கு. இன்னமும் யாருடைய பரிந்துரையோ தேவைப்பட்டுகிட்டே இருக்கு. 

கமல் சார் மாதிரியான கலைஞர்களே ‘சினிமா மற்றும் சினிமா ரசிகர்கள் மனநிலை புரியலை’னு இப்பவும் சொல்றாங்க. அதாவது இவ்வளவு ஆண்டுகளா கலைத்துறைல இருக்கும் அவருக்கே பிடிபடலை. அப்படியிருக்கிறப்ப நானெல்லாம் எம்மாத்திரம்!

எந்தப் படமா இருந்தாலும் என்னை புதுசா ஆடியன்ஸ் பார்க்கணும். இதை நோக்கிதான் என் தேடல் இருக்கு. அதே சமயம் இந்தக் கதை வேண்டாம்னு சாய்ஸ் வைக்கிற அளவுக்கு நான் பெரிய ஆளில்லை. நான் இதுவரை கத்துக்கிட்டதை வைச்சு கேரக்டர்களை தேர்வு செய்கிறேன். 

‘உறுமீன்’, ‘அலங்கு’, ‘பயணிகள் கவனிக்கவும்’ படங்களை டைரக்ட் செய்த சக்திவேல் பெருமாள்சாமி சாருடைய ‘காக்கி ஸ்குவாட்’ படத்தில் கதை நாயகனாக நடிக்கிறேன். இன்னும் சில பெரிய ப்ராஜெக்ட்ஸ் ஷூட் போகுது. முறைப்படி பட டைட்டிலோட அறிவிப்புகள் வரும்.