இந்தியாவில் தினமும் 4 ஆயிரத்துக்கும் அதிகமான குழந்தை திருமணங்கள் நடக்கின்றன. வருடத்துக்கு சுமார் 16 லட்சம் குழந்தை திருமணங்கள் நடக்கின்றன. இதில் 58 சதவீத திருமணங்களில் மணமகனின் வயது 21ஐ விட அதிகம். மணமகளின் வயது 18க்கும் குறைவு. மீதி 42 சதவீத திருமணங்களில் மணமகன் மற்றும் மணமகளின் வயது 18க்கும் குறைவு. 

சட்ட ரீதியாகவே குழந்தை திருமணத்துக்கு தடையிருந்தாலும் தொடர்ந்து நடந்துகொண்டேதான் இருக்கின்றன. இத்தகைய சூழலில் குழந்தை திருமண ஒழிப்புக்காக தொடர்ந்து போராடி வருகிறார் ரோஸ்னி பர்வீன். இவரும் குழந்தை திருமணத்துக்குப் பலிகடாவாக்கப்பட்டவர் என்பது குறிப்பிடத்தக்கது.

நன்றாகப் படித்து, நல்ல வேலைக்குச் செல்ல வேண்டும் என்ற கனவுடன் இருந்தவர் ரோஸ்னி. ஒன்பதாம் வகுப்பின் முழு ஆண்டுத் தேர்வு வந்தது. அந்த நேரத்தில் வசதியான ஒருவருக்கு ரோஸ்னியைத் திருமணம் செய்து வைத்துவிட்டனர் அவரது பெற்றோர். 

தேர்வு எழுதாமல், படிப்பை அப்படியே விட்டுவிட்டு, ஊரையும், நண்பர்களையும் பிரிந்து கணவரின் வீட்டுக்குச் சென்றுவிட்டார். அங்கே சென்றபிறகுதான் கணவருக்கு 45 வயது என்பது ரோஸ்னிக்குத் தெரியவந்தது. அதாவது, ரோஸ்னியைவிட, அவரது கணவர் 31 வயது மூத்தவர். ஆம்; ரோஸ்னிக்கு 14 வயதிலேயே திருமணமாகிவிட்டது.

பொருளாதார ரீதியாக யாருமே ஆதரவு தராததால், கைக்குழந்தையை வைத்துக்கொண்டு ஒரு ஷோரூமில் வேலைக்குச் சேர்ந்தார். இன்று ரோஸ்னிக்கு வயது 24. பீகாரில் குக்கிராமத்தில் வாழும் லட்சக்கணக்கான சிறுமிகளுக்குக் கலங்கரை விளக்கமாகத் திகழ்கிறார் ரோஸ்னி. 

தன்னுடைய வாழ்க்கையில் அனுபவித்த துயரங்களைக் கண்டு முடங்கிவிடாமல், தொடர்ந்து போராடி மகனை வளர்த்தார். மட்டுமல்ல, தன்னைப் போலவே யாரும் குழந்தை திருமணத்தால் பாதித்துவிடக்கூடாது என்று குழந்தை திருமணத்தை ஒழிக்கும் போராட்டங்களில் இறங்கினார்.