கேள்வியை நான் கேட்கட்டுமா... இல்லை நீ கேட்கிறாயா..?

விஷ்ணு விஷால் ஐஸ்வர்யா லட்சுமி ஜாலி குஸ்தி!

‘‘கேரள மண்ணில் புரண்டு செய்யும் பழமையான குஸ்திதான் ‘கட்டா குஸ்தி’. அந்தப் பழங்கால குஸ்திக்கு இந்தப் படத்திலே என்ன வேலை... ஏன் ஹீரோ அதைக் கையிலே எடுக்கறார்..? இதுதான் கதைக்களம்...’’ ஆர்வத்துடன் பேசத் தொடங்கினார் விஷ்ணு விஷால்.

இயக்குநர் செல்ல அய்யாவு பற்றி சொல்லுங்க..?

‘வேலைன்னு வந்துட்டா வெள்ளைக்காரன்’ படத்துக்கு அவர்தான் ரைட்டர். அந்த படத்திலேயே அவருடன் நல்ல நட்பு ஏற்பட்டுச்சு. அடுத்து நாங்க ரெண்டு பேரும் சேர்ந்து ‘சிலுக்குவார் பட்டி சிங்கம்’ படம் செய்தோம்.அப்பவே இந்த ‘கட்டா குஸ்தி’ படத்தின் ஒன்லைனை எனக்கு சொல்லிட்டாரு. அசந்துட்டேன். ‘சிலுக்குவார் பட்டி சிங்கம்’ முடிஞ்சதுமே இந்தப் படத்தை ஆரம்பிக்கணும்னு நினைச்சோம். இடைல கொரோனா... ஊரடங்குனு போனதுனால லேட் ஆகிடுச்சு. அந்த கேப்புல வேற ஒரு தயாரிப்பில் நிறைய படங்கள் கொடுக்க வேண்டியதாகிடுச்சு.  
தயாரிப்பு, ரிலீஸ்ல உங்களோடு சேர்ந்து மூணு நாயகர்கள் கைகோர்த்திருக்காங்க... எப்படி இந்த காம்போ சாத்தியமாச்சு?

நானும் தெலுங்கு மாஸ் ஹீரோ ரவி தேஜா சாரும் நல்ல நண்பர்கள். அப்பப்ப என் படங்கள், வேலைகளை எல்லாம் கேட்டுத் தெரிஞ்சிட்டே இருப்பார். அப்படித்தான் ‘எஃப்.ஐ.ஆர்’ முடிஞ்ச சமயத்துல ‘அடுத்து என்ன செய்யப் போறீங்க’ன்னு கேட்டார். ‘கட்டா குஸ்தி’ படம் அப்ப ஷூட்ல இருந்துச்சு. கதை என்னனு கேட்டார். சொன்னேன். உடனே ‘தெலுங்குல நான் தயாரிக்கிறேன்’னு முன்வாந்தார். அப்படித்தான் ரவி தேஜா சாருடைய ஆர்.டி டீம் ஒர்க்ஸ் படத்துல இணைஞ்சது.