நடிக்க வரலனா போலீஸ் அதிகாரி ஆகியிருப்பேன்..!

சொல்கிறார் ஆனந்த ராகம் அனுஷா

‘ஆனந்த ராகம்’ சீரியல் மூலம் தமிழ் ரசிகர்களுக்கு அத்தனை பரிச்சயமாகிவிட்டார் அனுஷா ஹெக்டே. பேச்சில் துணிவும், தடைகளை உடைத்தெறியும் தைரியமும் கொண்ட பெண்ணாக வலம் வரும் அவரின் ஈஸ்வரி கேரக்டர் மக்கள் மனங்களில் நீக்கமற இடம்பிடித்துவிட்டது. சென்னை சிட்லபாக்கத்திலுள்ள ஷூட்டிங் ஹவுஸில் ஆனந்தமாக நடித்துக் கொண்டிருந்தவரிடம் பேசினோம்.

‘‘ஆரம்பிச்ச மூணு மாசத்திலேயே இந்த சீரியலுக்கும் என் கேரக்டருக்கும் இவ்வளவு ரீச் கிடைக்கும்னு நான் எதிர்பார்க்கவே இல்ல. இது தமிழ்ல என் முதல் சீரியல். நிறைய ரெஸ்பான்ஸ் கிடைச்சது ரொம்ப சந்தோஷமா இருக்கு. இன்னும் பொறுப்பாக நடிக்கணும்னு நினைக்கிறேன்...’’ என அழகு தமிழில் உற்சாகம்பொங்க பேசுகிறார் அனுஷா. ‘‘சொந்த ஊர் மங்களூர். பிறந்து வளர்ந்ததெல்லாம் அங்கதான். என் தாய்மொழி துளு. எம்.காம் முடிச்சிருக்கேன். அப்புறம், டான்ஸ்ல எம்.ஏ. படிச்சிருக்கேன்.

அடிப்படையில் நான் கிளாசிக்கல் டான்சர். என் அப்பா உமேஷ் ஹெக்டே பிசினஸ்மேன். தவிர, விவசாயமும்  வீட்டுல பண்றோம். அம்மா ஸ்வர்ணலதா, பெண்கள் மற்றும் குழந்தைகள் ஆணையத்துல கவுன்சிலரா இருக்காங்க. கவுன்சிலிங் நிறைய பண்ணுவாங்க. அப்புறம் எனக்கு ஒரு தங்கச்சி, ஒரு தம்பி இருக்காங்க. கணவர் பிரதாப் தெலுங்கு சீரியல் ஆக்டர். இதுதான் என் குடும்பம்...’’ என எளிமையாக ஓர் அறிமுகம் கொடுத்தவரிடம் சின்னத்திரை பயணம் பற்றிக் கேட்டோம்.  

‘‘என் அப்பா தியேட்டர் ஆர்ட்டிஸ்ட்டா இருந்தார். டிராமா எல்லாம் பண்ணுவார். அதனால்தானோ என்னவோ என்னை மூணு வயசிலேயே பரதநாட்டியம் கத்துக்க அனுப்பிட்டார். நானும்  ஆர்வமாகி பல படிநிலைகளை படிச்சேன். இப்ப நடனத் தேர்வுக்கு ஜட்ஜ்ஜாக உட்கார அங்கீகாரத்தை அரசு எனக்கு தந்திருக்கு. நான் எம்.காம் முடிச்ச நேரம் நடிக்க ஒரு சான்ஸ் வந்தது. கிளாசிக்கல் டான்சர் என்பதால் என் ப்ரொஃபைலை முகநூல்ல பார்த்திட்டு கன்னட சீரியல்ல நடிக்க கூப்பிட்டாங்க. எனக்கு மெசேஜ் செய்து இப்படி ஒரு ப்ராஜெக்ட் பண்றோம்னு சொன்னாங்க. அப்புறம், என் நம்பரை கலெக்ட் பண்ணி பேசினாங்க.