இந்தாண்டு யுஎஸ் ஓபன் மகளிர் பட்டத்துக்கான இறுதியாட்டம் பல விதங்களில் வரலாற்றுச் சிறப்பு மிக்கது.முதலில் இம்மாதிரி இரண்டு பதின்ம வயதுப் பெண்கள் - சொல்லப்போனால் சிறுமியர்-மகளிர் பட்டத்துக்கான இறுதியாட்டத்தில் ஆடி பல்லாண்டுகள் ஆகிவிட்டன.

கடைசியாக 1999ல் செரினா வில்லியம்ஸும்  மார்ட்டினா ஹிங்கிஸும் விளையாடியதற்குப் பின் இப்போதுதான் இது  நிகழ்ந்திருக்கிறது.இதைச் சாதித்தவர்கள், லைலா ஃ பெர்னாண்டஸ் (Leylah Fernandez ) மற்றும் எம்மா ரடுக்கானு (Emma Raducanu). முறையே கனடா மற்றும் இங்கிலாந்து நாடுகளைச் சேர்ந்த வீராங்கனைகள் இவர்கள்.

இறுதியில் எம்மா ரடுக்கானு யுஎஸ் ஓபன் மகளிர் பட்டத்தை வென்றதன் வழியாக மிக நீண்ட காலத்துக்குப்பின் பிரிட்டிஷ் பெண் ஒருவர் டென்னிஸில் பட்டம் வென்றார் என்ற பெருமையைப் படைத்திருக்கிறார்.

இதில் இன்னொரு முக்கியமான அம்சம், இறுதிப் போட்டியில் பங்கேற்ற இந்த இருவருமே கலப்பினத்தவர் என்பது. லைலா ஈக்வடார் நாட்டு கறுப்பினத் தந்தைக்கும், கனடாவில் குடியேறிய பிலிப்பைன்ஸைச் சேர்ந்த மங்கோலிய இனத் தாய்க்கும் பிறந்தவர். எம்மா ரடுக்கானுவின் தாய் ஒரு சீனர், தந்தை ருமேனியா நாட்டைச் சேர்ந்தவர். அசப்பில் நேபாளிய அல்லது நம் நாட்டின் வடகிழக்கு மாநிலங்களிலிருந்து வந்த ஒரு பெண் போல எம்மா இருக்கிறார்.

யுஎஸ் ஓபன் மகளிர் பட்டம் வென்ற எம்மா குறித்து பேச அவ்வளவு விஷயங்கள் இருக்கின்றன.

ஏனெனில், தகுதிச்சுற்று வீரராக களம் இறங்கி பல முன்னணி வீரர்களைத் தோற்கடித்து, விளையாடிய பத்து போட்டிகளிலும் ஒரு செட் கூட இழக்காமல் இறுதிப் போட்டியில் வெல்வது எல்லாம் அசாத்தியமான சாதனை. 18 வயதேயான எம்மா ரடுக்கானுக்கு இதெல்லாம் கைகூடியிருக்கிறது.

150வது ரேங்க் வீரராக தொடருக்குள் நுழைந்து, இறுதிப்போட்டியில் மற்றொரு இளம் வீராங்கனையான லைலா ஃபெர்னாண்டஸை 6-4, 6-3 என நேர்செட்டில் தோற்கடித்து, புதிய சகாப்தம் படைத்து, அமெரிக்க ஓபன் சாம்பியன் பட்டத்தை வென்றுள்ளார் எம்மா ரடுக்கானு.கோப்பையை வெல்ல ரடுக்கானு கடந்து வந்த பாதை அவ்வளவு எளிதானதல்ல.