சன் டிவியின் மெகா தொடர் டைரக்டர்!

கலைஞரின் எழுத்தில் மூன்று சீரியல்களை இயக்கியவர்...
இஸ்கான் ஆன்மிக நிறுவனத்துக் காக நாடகக் குழு நடத்துபவர்...
2 வெப் சீரிஸ்களில் முத்திரை பதித்தவர்...

இன்று சன் டிவியின் மெகா தொடர் டைரக்டர்!

‘‘மெகா தொடர்னாலே, வீட்டுக்குள்ள ஒரு பத்து, பனிரெண்டு ஆர்ட்டிஸ்ட்கள் சூழ்ந்து இருக்கற மாதிரி மூணு நாலு ட்ராக் வச்சுதான் பல சீரியல்கள் போயிட்டிருக்கு. அதுல எங்க தொடர் வித்தியாசமானது. ஒரு அப்பா, கவுதம்... அந்த அப்பாகிட்டேந்து பாசம் கிடைக்காத பொண்ணு, மீரா. அவங்க ரெண்டு பேரையும் சேர்த்துவைக்க நினைக்கற ஹீரோ, யுவா. இவங்கதான் மெயின் ரோல்ஸ்.

இதையும் தாண்டி, கதைல முக்கியமான ஹீரோவா அப்பாவுடைய ரெண்டாவது மனைவி யமுனாவை சொல்லலாம். சித்தினாலே கொடுமைக்காரினு நினைப்பு வரும். ஆனா, இந்த சித்தி அப்படியில்ல. பாசிட்டிவ் சித்தி. மீராவை தனக்கு பிறந்த பெண் மாதிரி அன்பைப் பொழியும் அம்மா. இதுதான் சன் டிவில திங்கள் - சனி இரவு 8.30க்கு டெலிகாஸ்ட் ஆகும் எங்க ‘கண்ணான கண்ணே’ சீரியல்...’’ எனர்ஜியாக பேசுகிறார் இந்த மெகா தொடரின் இயக்குநரான தனுஷ்.

இதற்குமுன் கலைஞரின் கைவண்ணத்தில் உருவான ‘ரோமாபுரிப் பாண்டியன்’, ‘தென்பாண்டிச் சிங்கம்’, ‘இராமானுஜர்’ ஆகிய தொடர்களை இயக்கியவர் இவர்.‘‘பூர்வீகமே சென்னைதான். அடிப்படைல நான் நடிகன், நாடகக்காரன். ‘இஸ்கான்’ (ஹரே ராமா ஹரே கிருஷ்ணா) சார்பில் ஒரு டிராமா ட்ரூப் நடத்திட்டு வர்றேன். பாகவதத்தில் இருந்து பல கதைகளைக் கொண்டு, இருபது மேடை நாடகங்கள் நடத்தியிருக்கோம்.

மேடைல நடிகர்கள் பின்னாடி எல்.இ.டி. திரை, வாய்ஸ் ஓவர், லிப் சிங்க் எல்லாம் செட் பண்ணிதான் அந்த பக்தி நாடகங்களை அரங்கேற்றுவோம். கோகுலாஷ்டமி மாதிரி தினங்கள்லதான் நாடகம் நடக்கும். நான் சீரியல் இயக்குவேன்னு நினைச்சதில்ல. கலைஞர் ஐயாவை சந்திக்கறதுக்கு முன்னாடி வரை, அவரோட நூல்கள் எதையும் வாசிச்சதில்ல. திடீர்னு ஒருநாள் எல்லாம் அமைஞ்சது. குட்டிபத்மினி மேடத்தால்தான் சீரியலுக்குள் வந்தேன். ஏன்னா, அவங்களோட சீரியல்கள்ல அப்ப நடிச்சுட்டு இருந்தேன்.