ராஜ்யசபாவில் பாஜகவுக்கு மெஜாரிட்டி இல்லை... நடைபெறும் 5 மாநில சட்டமன்றத் தேர்தல் அக்கட்சிக்கு முக்கியம்!

மத்தியில் 2014ம் ஆண்டு பாஜக ஆட்சி பொறுப்பேற்றது. அன்று முதல் 2018ம் ஆண்டு முடியும் வரை நேரடியாகவும், மாநிலக் கட்சிகளுக்கு ஆதரவு அளித்தும், ஒருசில மாநில அரசுகளை கைப்பாவையாக வழிநடத்தியும், கிட்டத்தட்ட 21 மாநிலங்களில் அங்கம் வகித்தது பாஜக. இது நாட்டின் மொத்த மக்கள் தொகையில் 70 சதவீதம். ஆனால், 2019ம் ஆண்டு மத்தியில் அதிக பெரும்பான்மையோடு ஆட்சிக் கட்டிலில் மீண்டும் அரியணை ஏறிய பாஜக, அதன்பின் நடந்த பல மாநில சட்ட மன்றத் தேர்தல்களில் பின்னடைவைச் சந்தித்து வருகிறது.

இதனால், அதிரடியாக தனது தேர்தல் யுத்திகளைக் கையாண்டு பல வெற்றிகளைக் குவித்த பாஜகவின் செயல் இப்போது என்னவானது? அல்லது பிரதமர் மோடியின் தலைமையிலான பாஜகவுக்கு வாக்களிக்க யாரும் தயராக இல்லையா? அல்லது மோடி-அமித்ஷா கூட்டணிக்குப் பின் பாஜகவின் தலைவராகப் பொறுப்பேற்ற ஜே.பி.நட்டாவை மக்கள் ஏற்கவில்லையா? போன்ற கேள்விகள் எழுந்துள்ளன.

இந்நிலையில் இப்போது நடந்து கொண்டிருக்கும் ஐந்து மாநில சட்டமன்றத் தேர்தல் பாஜகவுக்கு எந்த அளவு முக்கியத்துவம் வாய்ந்ததாக இருக்கும் என்ற கேள்வியை பத்திரிகையாளரும், ‘தன்னாட்சி தமிழகத்தை’ச் சேர்ந்தவருமான ஆழி செந்தில்நாதனிடம் முன்வைத்தோம். “பாஜகவைப் பொறுத்தவரை அவர்களின் முக்கிய கவனம் மேற்கு வங்கம்தான். எட்டு கட்டங்களாகப் பிரித்து ஸ்டெப் பை ஸ்டெப்பாக தன் கையில் கொண்டு வருவதற்கான எல்லா வேலைகளையும் செய்கிறார்கள்.

மம்தா பானர்ஜி ஒருவேளை ஜெயித்தால் கூட அந்தக் கட்சியை உடைத்து அவர்களால் ஆட்சியைக் கொண்டு வர முடியும். ஏனெனில் மம்தா தலைவராக இருக்கும் திருணாமுல் காங்கிரஸ், பாஜக ஆகிய இரு கட்சிகளுக்குமே பெரும்பான்மை வருவதற்கான வாய்ப்புகள் குறைவு என்றே கருத்துக் கணிப்புகள் தெரிவிக்கின்றன.

எனவே, திருணாமுல் காங்கிரஸ் ஆட்சி அமைக்கும் நிலை ஏற்பட்டாலும் பாஜக எம்எல்ஏக்களை விலைக்கு வாங்கி தன் பக்கம் ஈர்ப்பதற்கான நடவடிக்கைகளில் இறங்கும். அப்படித்தான் கர்நாடகா, மத்தியப் பிரதேசம் போன்ற மாநிலங்களில் நடந்தது.  அதேநேரம் தமிழகம், கேரளாவை பாஜக கணக்கிலேயே எடுத்துக் கொள்ளவில்லை. இவ்விரு மாநிலங்களிலும் பாஜக ஒரு சீட் ஜெயித்தாலும் லாபம்தான். அவர்களுக்கு இப்போது மேற்கு வங்கம்தான் முக்கியம்.

அசாமில் கூட மீண்டும் ஆட்சி அமைக்க நினைக்கலாம். அங்கு ஒருவேளை தோல்வியைச் சந்தித்தாலும் அது சின்னசறுக்கலாக இருக்கலாமே தவிர, பெரிதாக இருக்காது. நடக்கும் ஐந்து மாநில சட்டமன்றத் தேர்தலை ஒட்டுமொத்தமாகப் பார்த்தால் பாஜகவுக்கு லாபம்தான். யார் வந்தாலும் தங்களுடைய ஆட்சியாக மாற்றுவதற்கு எல்லா வேலைகளையும் பார்ப்பார்கள்...’’ என்கிறார் ஆழி செந்தில்நாதன்.