நீடாமங்கலம் to மன்னார்குடி 2100 மரப்போத்துகள்! சாதித்த கிரீன் நீடா

ஒன்றல்ல… இரண்டல்ல… இரண்டாயிரத்து நூறு மரப்போத்துகள். சுமார் 12 கிமீ தூரத்துக்கு, அதுவும் நான்கே மணி நேரத்தில் சாலையின் இருபுறங்களிலும் நட்டு ஒரு புதிய சாதனையே படைத்துள்ளனர் நீடாமங்கலத்தைச் சேர்ந்த ‘கிரீன் நீடா’ என்ற அமைப்பினர். இவ்வளவு தொலைவுக்கு மரப்போத்துகள் நட்டது தமிழகத்தில் இதுவே முதல்முறை.

‘‘இதை வெறும் சாதனைக்காக செய்யல... முன்னாடி எங்க பகுதி ரொம்பப் பசுமையா குளுகுளுனு இருக்கும். சாலையை விரிவுபடுத்தும்போதும், கஜா
புயலின்போதும் நிறைய மரங்கள் போயிடுச்சு. அதை சமன் செய்ய இவ்வளவு மரப்போத்துகளை நட்டிருக்கோம்...’’ அமைதியாகச் சொல்கிறார் ‘கிரீன் நீடா’ அமைப்பின் தலைமை ஒருங்கிணைப்பாளரான ராஜவேலு. இவர், சென்னை கோபாலபுரத்தில் உள்ள தமிழ்நாடு நுகர்பொருள் வாணிபக் கழகத்தில் பணியாற்றி வருகிறார்.

‘‘பொதுவா, மரம் வளர்க்க நினைக்கிறவங்க மரக்கன்றுகளைத்தான் நடுவாங்க. இதை ஆடு, மாடுகள் தின்ன வாய்ப்பிருக்கு. இதைத் தடுக்க வேலி போடணும். தினமும் தண்ணீர் ஊத்தணும். வளர்றவரை கண்ணும் கருத்துமா பாதுகாக்கணும். பராமரிப்பு செலவு அதிகம் பிடிக்கும். ஆனா, மரப்போத்துகளுக்கு இது தேவையில்ல.

மரப்போத்துன்னா மரக்கிளையின் ஒரு பகுதி! அதை ஒடிச்சு மண்ணுல ஊன்ற வேண்டியதுதான். நான் சின்ன வயசுல இருக்கும்போது எங்க கிராமத்துப் பெரியவங்க இப்படி மரப்போத்துகளைக் குளக்கரைல ஊன்றுவதைப் பார்த்திருக்கேன். நல்லா வளரும். அந்த ஐடியாவை பின்பற்றி இதைச் செய்தேன்...’’ என்கிற ராஜவேலு, இந்த அமைப்பைத் தனியொருவராக துவக்கியிருக்கிறார்.

‘‘எங்க ஊர் நீடாமங்கலம். தஞ்சாவூர்ல இருந்து திருவாரூர் போகிற வழியில இருக்கு. வடக்கு தெற்கா எடுத்துக்கிட்டா கும்பகோணத்திற்கும், மன்னார்குடிக்கும் நடுவுல வரும். கல்லணைல இருந்து பிரியும் வெண்ணாறு, எங்க ஊர்ல மூன்றாகப் பிரியும். அதனால, நீடாமங்கலம் எப்பவும் செழிப்பா இருக்கும். முப்போகம் விளைகிற பூமி. கோடையில கூட பம்ப் செட்ல சாகுபடி பண்ணுவாங்க. நான் அங்க பாலாஜி நகர்ல குடியிருக்கேன். பிறந்து வளர்ந்ததெல்லாம் நீடாமங்கலம் அருகே கானூர் கிராமத்துல.

சின்ன வயசுலயே மரம் வளர்க்கணும்னு ஆர்வம். 2018ல் இந்த கிரீன் நீடா சுற்றுச்சூழல் அமைப்பை ஆரம்பிச்சேன். இதுல நீடாங்கிற வார்த்தை நீடாமங்கலத்தைக் குறிக்கும். அதேநேரம் பறவைகளின் கூடுனு ஒரு அர்த்தமும் இருக்கு. மெல்ல மெல்ல என் நண்பர்களும் அமைப்புல இணைஞ்சாங்க. அப்புறம், சமூக வலைத்தளத்துல நாங்க செய்கிற வேலைகளைப் பார்த்து இன்னும் சில நண்பர்கள் வந்தாங்க. எங்கள் கூடு கொஞ்சம் கொஞ்சமா விரிவாச்சு. இப்ப ஐம்பதுக்கும் மேற்பட்டவங்க அமைப்புல இருக்காங்க. இதுல பெரும்பாலானவங்க அரசு ஊழியர்கள்...’’ என்கிறவர் மரப்போத்துகள் நட்ட விஷயத்தை விவரித்தார்.

‘‘முதல்ல, நாங்க எங்க ஊர் ரயில்நிலைய - பேருந்து நிறுத்தம் அருகே அரசமரக்கன்றை வச்சோம். அப்புறம், நஞ்சில்லா காய்கறிகளைக் கொடுக்க மாடித் தோட்டத்துக்கான பயிற்சி கொடுத்தோம். இந்த ஆண்டு தொடக்கத்துல 2019 பனை விதைகள் விதைக்கலாம்னு நினைச்சோம். ஆனா, போதுமான ஆட்கள் எங்ககிட்ட இல்ல. அப்ப வட்டார வளர்ச்சி அலுவலர்கிட்ட பேசினோம். அவங்க மாவட்ட ஆட்சியர்கிட்ட பேசினாங்க. அப்புறமென்ன... நூறு நாள் பணியாளர்களை வச்சு அந்தப் பணியைச் சிறப்பா ெசய்தோம்.  

பிறகு, கானூர் கிராமத்துல ஒரு ஏக்கர் பரப்புல குளம் வெட்டினோம். இதை முகநூல்ல பார்த்திட்டு சவுதியில் இருக்குற ஜெட்டா தமிழ்ச் சங்கத்தைச் சேர்ந்தவங்க 50 ஆயிரம் ரூபாய் நிதி கொடுத்து உதவினாங்க. நாங்க மேலும் 50 ஆயிரம் ரூபாய் போட்டு குளத்தை உருவாக்கினோம். அதைச் சுற்றியும் பனை விதைகள் தூவினோம்.