பெய்ய வேண்டிய மழை இன்னமும் வானில் மிச்சம் இருக்கிறது !

டிராட்ஸ்கி மருதுவின் இத்தாலி அனுபவங்கள்

புகழ் பெற்ற ஓவியக்கலைஞர் டிராட்ஸ்கி மருது எப்போதும் பயணங்களோடு நெருக்கமாக வாழ்பவர். தன் கோடுகளோடு வாழ்க்கைக்கு அர்த்தத்தைத் தேடும் முயற்சியுடன் இவரது எல்லைகள் விரிந்து இருக்கின்றன. எல்லாச் சாலைகளும் ரோமை நோக்கி என்பார்கள். இப்போது இத்தாலியிலிருந்து ஓவியப் பபயணத்தை முடித்துக்கொண்டு திரும்பியிருக்கிறார்.

எந்த நாட்டுக்குப் போனாலும் நான் அங்கேயிருக்கிற ஓவியங்களை, மியூசியத்தை பார்க்க செலவிடும் நேரத்தையே முக்கியமாகக் கருதுவேன். ஆயிரம் ஆண்டுகளுக்கு முன்னதான பழமையும், ஒழுங்கும் காலம் உறைந்து இருக்கும் அற்புதங்களும் கொண்ட இடங்களுக்கு தேடித் தேடிப் போகிறேன். நான் செல்வது டூரிஸ்ட் ஸ்பாட்கள் அல்ல. ஒவ்வொரு இடத்தையும் முழுக்க தெரிந்து கொண்டுதான் செல்கிறேன்.

ஐரோப்பாவில் ஜெர்மனி, பாரீஸ், லண்டன், சிசிலி மற்றும் ஜப்பான், கனடா, நியூயார்க் என தேடிக் கண்டடைந்த தரிசனங்களைச் சொல்லி மாளாது. பள்ளிக்கூடங்களில், பின்பு ஓவியம் பயிலும்போதான இடங்களில் கற்றவை, பார்த்தறிந்தவைகளை நேரில் பார்த்து தரிசனம் பெறும்போது பெற்ற உணர்வுத் ததும்பல்களை வார்த்தைகளில் அப்படியே சொல்வது கடினம்.

உண்மையான பயணிக்குத்தான், தான் எங்கு செல்கிறோமென்று தெரியாது என்பார்கள். தன்னுடைய கலையின் மூலம் தன்னுடைய குரலை மற்றவர்களுக்கு கேட்கும் வண்ணம் நமது முந்தைய ஓவியர்கள் செய்திருக்கிறார்கள். இப்படியான பயணங்களில் முகம் தெரியாத மனிதர்களுடன் கடந்துபோயிருக்கிறேன். பார்த்த  எல்லா ஓவியங்களுக்கும் தனியாக சரித்திரமிருக்கிறது.

அதுவும் கடந்தகாலம், நிகழ்காலம், எதிர்காலம் என காலங்களுக்குள் பயணம் போகும். அவற்றின் மகத்துவத்தை நீங்கள் நேரில் பார்த்தே அறிய வேண்டும். இந்த இத்தாலி ரோம் பயணத்தின் வாயிலாக நானே என்னை திரும்பிப் பார்த்துக்கொண்டேன். ஓவியர்கள் யார் யாரெல்லாம் அங்கே அரூபமாக வாழ்ந்து கொண்டிருக்கிறார்கள் என நினைக்கையில் ஆச்சரியமாயிருக்கிறது.

இந்தமுறை இத்தாலி ரோமை நோக்கி என் ஓவியப் பயணமென ஆக்கிக்கொண்டேன். மகாபலிபுரத்தைச் சேர்ந்த சிற்பிகள் ரமேஷ், பாஸ்கர், மற்றும் இத்தாலியைப் பிறந்த இடமாகக் கொண்ட சிற்பி ஸ்டிஃபனோவும் என்னுடன் வந்தார்கள். இந்த இத்தாலிய சிற்பி பல காலமாக இந்தியாவுக்கு வந்து போய்க்கொண்டு இருக்கிறார். ஸ்வீடனில் வாழ்ந்திருக்கும் அவர், இத்தாலி போய்ச் சேர்ந்து எங்களுக்காகக் காத்திருந்தார்.

இருந்த நாட்கள் முழுவதும் இத்தாலியின் பரப்புகளை காரிலேயே பயணம் செய்து காண நேர்வது எனது வாழ்க்கையின் நற்பலன்தான். ஆர்விதோ, பெருசியா, சியன்னா, ஃப்ளோரன்ஸ், பைசா நகரங்கள் வழியாக வந்து சேர்ந்த ரோம் நகரில் அதிக நாட்களைக் கழித்தோம். என் அனு பவங்கள் விரிய விரிய தொலைவிலிருந்து அழைத்துக் கொண்டிருந்த அந்த நகரங்களோடு நான் உள்ளூரக் கலந்தேன்.