ஓஷோவோ, அதை தன்னுடைய தனித்தன்மையான தர்க்கத்தால் எதிர்கொண்டார்.“நான் மட்டுமல்ல. அனைவருமே பகவான்தான். இறைவன் நம் அனைவருக்குள்ளும் நிறைந்திருக்கிறான். உயிர்களில் மட்டுமல்ல. மலை, மரம், காற்று, கடல் என்று எல்லா இடத்திலும் அவன் வீற்றிருக்கிறான். நமக்குள் இருக்கும் இறைத்தன்மையை உணர்பவர்கள் இத்தகைய கேள்வியை எல்லாம் கேட்டுக் கொண்டிருக்க மாட்டார்கள்...” என்று கூறி வாயடைத்தார்.

மேற்கத்திய நாடுகளில் அவரை ‘வாழும் புத்தர்’ என்று அழைக்கத் தொடங்கினார்கள். ஐரோப்பா மற்றும் அமெரிக்காவில் இருந்தும் பல நூறு பேர் இந்தியாவுக்கு வந்து ஓஷோவிடம் சன்னியாசம் வாங்கி, புதிய சன்னியாசிகள் இயக்கத்தில் தங்களையும் இணைத்துக் கொண்டார்கள்.

உடல்நலம் குன்றிய நிலையில் தியான வகுப்புகளில் கலந்துகொள்வதையும் ஓஷோ குறைத்தார். அவருக்குப் பதிலாக அலங்கரிக்கப்பட்ட நாற்காலி ஒன்று மத்தியில் இருக்கும். அதில் ஓஷோ அமர்ந்திருப்பதாக, தியான வகுப்புகளில் கலந்துகொள்வோர் கருதி, தியானம் செய்வார்கள்.உடல் என்பது நிலையற்றது.

தன்னுடைய உடல் மறைந்தபிறகும் தனக்கான இருக்கை இருப்பதாக நினைத்து தன்னுடைய கருத்துகளைப் பின்பற்றவேண்டும். தியானமுறைகளைப் பின்பற்றி, மக்களிடமும் எடுத்துக்கூற வேண்டும் என்று சீடர்களிடம் அடிக்கடி சொல்ல ஆரம்பித்தார்.

தன்னுடைய சொந்த உடலைப் பரிசோதித்து, வேறு சில புதிய முறைகளையும் அறிமுகப்படுத்தினார். தியானம் மட்டும் போதாது, அனைவரும் தெரப்பி சிகிச்சைகளையும் எடுத்துக்கொள்ள வேண்டும்.

இரண்டும் இணைந்தால்தான் போதுமான பலன் கிடைக்கும் என்றார்.ஓஷோவிடம் தெரப்பி சிகிச்சைகளில் நிபுணத்துவம் பெற்றிருந்த சீடர்களும் இருந்தார்கள். அவர்கள் மூலமாக அனைவருக்கும் தெரப்பி வழங்கப்பட்டது.