‘‘பெயர்தான் ‘களவாணி’. ஆனால், அந்தப்படம் எனக்குக் கொடுத்தது மிகப்பெரிய மரியாதை. செம ஹிட். இப்ப அடுத்ததாக இறங்கிச் செய்றது ‘களவாணி-2’. அதே தகிப்பை இப்போ உணர்றேன்.

அதுல கிடைச்ச அங்கீகாரத்தை தக்க வைக்கணும்னு ரொம்ப ஆசை. சளைக்காம, மலைக்காம, அதே பொழுதுபோக்கையும், காமெடியையும், உற்சாகத்தையும் ‘களவாணி-2’விலும் கொண்டு வந்திருக்கேன்...’’ நிதானமாகப் பேசத் தொடங்குகிறார் இயக்குநர் சற்குணம். ஆரவாரமின்றி முதல் படத்திலேயே மனதை அள்ளிப்போனவர்.

இந்தப்படத்தை உடனேகூட எடுத்திருக்கலாம். அடுத்ததா முதல் படத்தின் எந்த சாயலும் இல்லாமல் ‘வாகை சூடவா’னு ஒரு பீரியட் ஃபிலிம்தான் சரின்னு தோணுச்சு. அப்படி ஒரு கதையைப் பிடிக்கும்போது, எவ்வளவு இழந்திருக்கோம்னு சுரீர்னு உறைச்சது.

எவ்வளவு திருவிழாக்கள், சடங்குகள், உறவுகள்... எல்லாத்தையும் உதறிட்டு வந்திருக்கோம்னு புரிஞ்சது. அது எல்லாத்தையும் ஒரு கதையில மீள் உருவாக்கம் செய்து அதுவே தேசிய விருது வாங்கினதெல்லாம் எனக்கு சந்தோஷமே!அந்த விமல் - ஓவியா ஜோடி அவ்வளவு அருமையாக இருந்தது...

விமல் கூட, ‘இப்ப ஓவியா வந்தால் முன்னே மாதிரி ஈஸியாக ஒர்க் பண்ணுவாங்களா’ன்னு கேட்டார். எனக்கே அவர் சுலபமாக பழைய ஓவியாவா சொன்னபடி நடிச்சுக் கொடுப்பாங்களான்னு சந்தேகம் இருந்தது.

ஆனால், அவங்க ரொம்ப நிதானமாக, மரியாதையா, முதல் படத்தில் நடிச்ச அதே ஓவியாவாக நடிச்சுக்கொடுத்தாங்க. அவங்களை இந்தப் புகழ் பாதிக்கவே இல்லை. விமலும், ஓவியாவும் அசரவேயில்லை. ஒரு கிராமத்து இளைஞன், இளைஞியின் தத்ரூப வாழ்க்கையை அவ்வளவு அருமையாகக் கொண்டு வந்திருக்காங்க.

யதார்த்த வகையில் கதை சொல்றதுதான் என் பாணி. அதில் பிசகாமல் செய்திருக்கேன். அதே கிராமத்து அழகும் சிரிப்புமா லைட்டா கொஞ்சம் எடை கூடி வந்திருக்கு ஓவியா. காதலும், காதல் நிமித்தமும்னு சொல்வாங்களே... அதற்கு அச்சு அசல் உதாரணம்தான் இவங்க ரெண்டு பேரும்.

‘களவாணி’யில் அந்த ஏரியாகூட ஒரு கேரக்டரா இருக்கும்...போன தடவை போன ஒரத்தநாடு, மன்னார்குடின்னு அதே இடத்தை காண்பிக்காமல் அதே சிறப்புள்ள வேறு இடம் பிடிச்சிருக்கோம்.

அதே இளவரசு, சரண்யா பொன்வண்ணன், கஞ்சா கருப்புனு 95 சதவீதம் அதே ஆளுங்கதான். சூரிக்கு பதிலாக ஆர்.ஜே.விக்கி. மயில்சாமி கூடுதலாக சேர்ந்திருக்கார். சுதாகர்னு ஒரு வில்லன். அந்தப்பக்கத்து பேச்சை அப்படியே வைச்சுக்கிட்டு அவர் நடிக்கிறதை நீங்க ரொம்ப ரசிப்பீங்க.

மூணு இசையமைப்பாளர்களை அறிமுகப்படுத்தியிருக்கிறீங்க...பாடலாசிரியர் மணி அமுதவனை இசையமைப்பாளராக ஆக்கிட்டேன். அவருக்கு நல்ல இசையறிவு இருந்தது. நாம அறிமுகப்படுத்தி அந்த நல்ல பெயரை எடுத்துக்குவோம்னு நினைச்சேன். ‘அலுங்குறேன், குலுங்குறேன்’, ‘சொடக்கு மேலே’ பாட்டு எழுதினது எல்லாம் அவர்தான்.

அவரை ‘ஒட்டாரம் பண்ணாத’ன்னு ஒரு பாட்டு எழுத வைச்சு, அது வெளிவந்து செம ஹிட்.