இட ஒதுக்கீடு கேட்டு இன்று போராட்டங்கள் அதிகரிப்பது ஏன்..?

இரு மாதங்களுக்கு முன்பு மஹாராஷ்ட்ராவின் மக்கள் தொகையில் முப்பது விழுக்காடு உள்ள மராத்தா சமூகத்தவர்கள் தங்களுக்கும் இட ஒதுக்கீடு வேண்டும் என்று சாலைக்கு வந்து போராடினார்கள். கல்வி, வேலை வாய்ப்பில் பதினாறு சதவீத இட ஒதுக்கீடு வேண்டும் என்ற அவர்கள் போராட்டத்தில் குதித்தபோது ஒட்டுமொத்த இந்தியாவும் அந்தப் போராட்டத்தைக் கவனித்தது.

மராத்தா சமூகத்தவர்கள் மட்டுமல்ல, இந்தியா முழுதும் பல்வேறு புதிய சமூகங்கள் ஒன்றன் பின் ஒன்றாக தங்களுக்கும் இட ஒதுக்கீடு வேண்டும் என்று கேட்டு போராட்டத்தில் குதித்துக்கொண்டே இருக்கின்றன. கடந்த 2016ம் ஆண்டு அரியானாவில் ஜாட் இனத்தினர் தங்களுக்கு கல்வி, வேலைவாய்ப்பில் இட ஒதுக்கீடு வேண்டும் என்று கேட்டு போராட்டத்தில் இறங்கியபோது பெரும் வன்முறை வெடித்து முப்பது பேர் இறந்து போனார்கள். முந்நூறுக்கும் அதிகமானவர்கள் காயமுற்றார்கள்.

அதே ஆண்டு ஆந்திரப் பிரதேசத்தின் கப்பு இனத்தவர்கள் தங்களுக்குப் பிற்படுத்தப்பட்டோர் பட்டியலில் இடம் வேண்டும் என்று கேட்டுப் போராட்டத்தில் ஈடுபட்டபோது வன்முறை ஏற்பட்டதில் ரத்தினாஞ்சல் எக்ஸ்பிரஸ் ரயிலின் சில பெட்டிகள் தீக்கிரையாகின.அதற்கும் முன்பு 2015ம் ஆண்டு பட்டேல் இனத்தவர்கள் தங்களுக்கு பிற்படுத்தப்பட்டோர் பட்டியலில் இட ஒதுக்கீடு வேண்டும் என்று கேட்டு குஜராத் மாநிலம் முழுதும் போராட்டத்தில் ஈடுபட்டனர்.