ஓபிஎஸ், இபிஎஸ்... இருவர் கையிலும் கத்தி!

நாஞ்சில் சம்பத் சரவெடி

‘‘அரிதாரம் பூசிய அவதார புருஷர்கள் ஆளுக்கொரு பக்கம் அள்ளி விட்டுக்கொண்டிருக்கும்போது இந்த சந்தடியில் சம்பத் எதற்கு?’’ எனக் கேட்டுவிட்டு குபீரென சிரித்த நாஞ்சில் சம்பத், பேட்டிக்குத் தயாரானார். கேள்விகள் முடிவதற்கு முன்பே பதில்கள் ஏவுகணைகளாக சீறிப்பாய்ந்தன. அடுத்த அரைமணி நேரத்திற்கு அவருக்கேயுரிய எதுகை மோனை, நக்கல் நையாண்டி விளையாட்டுதான். பரபரப்பான அரசியலிலிருந்து திடீரென்று ஒதுங்கிவிட்டீர்கள். இப்போது உங்கள் காலம் எப்படி ஓடுகிறது?

இதழ் ஒன்றில் ‘ஒரு மேடைக்காதலன்’ என்ற தலைப்பில் தொடர் எழுதி வருகிறேன். அப்புறம் 1986ம் வருடத்திலிருந்து கல்லூரிகளில், கருத்தரங்குகளில், பட்டிமன்றங்களில், வழக்காடு மன்றங்களில் உரையாற்றிய இலக்கியப் பேச்சுகளைத் தொகுத்து புத்தகமாக்கும் முயற்சியில் ஈடுபட்டுள்ளேன். இலக்கிய பயணத்திலேயே மிச்சமுள்ள நாட்களை நகர்த்த முடியும் என நம்புகிறேன். தராதரமும், தகுதியும் இல்லாதவர்களின் தங்குமிடமாகிப்போன அரசியலில் என் நாக்கிற்கு இனி வேலை இல்லை.

மேடைத் தமிழ் பயிற்சிப் பட்டறை என்ற ஒரு அமைப்பைத் தொடங்கி, மேடையில் பேச ஆர்வம் உள்ள தம்பிகளுக்கு, சங்கத் தமிழ், சமயத் தமிழ், சமகாலத் தமிழ், சரித்திரத் தமிழ், தன்மானத் தமிழ் ஆகியவற்றை கற்பித்துத் தரப்போகிறேன். அரசியல், இலக்கியம், வரலாறு மூன்றையும் உள்ளடக்கி அவர்களுக்கு சென்னையில் பயிற்சியளிக்க வேண்டும். அப்படியொரு திட்டமுள்ளது. அதை நடைமுறைப்படுத்துவது குறித்தே யோசித்துக்கொண்டிருக்கிறேன்.

தமிழ்நாடு அரசியலைக் கூர்ந்து கவனிக்கிறீர்களா?

நிச்சயமாக. ஏர் ஓட்டுவதை நிறுத்திவிட்டாலும் வயலைப் பார்க்காமல் உழவன் தூங்க முடியுமா? இங்கே ஸ்திரமற்ற அரசியல் சூழல் நிலவுகிறது. 18 சட்டமன்ற உறுப்பினர்களின் தகுதி நீக்க வழக்கு நீதிமன்றங்களில் இருக்கிறது. அதற்கான தீர்ப்பு இன்னும் வெளிவரவில்லை. அந்தத் தீர்ப்பு வந்தபிறகு இந்த ஸ்திரமற்ற அரசியல் சூழல் ஒரு முடிவுக்கு வந்து விடும். இப்போது நடப்பது என்ன தெரியுமா..? இடைவேளையை ஆக்கிரமித்துக் கொண்டவர்கள் இடைவேளைதான் நிரந்தரம் என்று எண்ணிக் கொண்டிருக்கும் அறியாமை! இதை எந்தக் கோயிலில் போய் முறையிடுவது?