காடு அரசாங்க சொத்து அல்ல!

உண்மையைப் பேசும் ‘மரகதக்காடு’

‘‘காடுனா அது ஒரு மரக்கூட்டம்... ஜாலியா பிக்னிக் போயிட்டு வர்ற இடம்னு நினைக்கறோம். உண்மைல காடு என்பது உயிர்க் கூட்டம். ஊர்வன, பறப்பன, நடப்பனனு அங்க ஏராளமான உயிர்கள் இருக்கு. உதாரணத்துக்கு நாங்க போயிட்டு வந்த காட்டுலயே பூச்சியினங்கள் மட்டுமே 600 வகைகளுக்கு மேல இருக்கு! புல் வளர்ந்திருக்கிற இடங்கள்ல மானும் காட்டெருமையும் வசிக்கும். இந்த இரண்டும் இருந்தா அங்க புலியும் சிறுத்தையும் இருக்கும். அகலமா மரங்கள் உள்ள காடுனா யானைகள் அங்க அதிகமா இருக்குனு அர்த்தம். ஈரப்பதம் உள்ள காடுகள்ல பாம்புகளின் கூட்டத்தைப் பார்க்கலாம்!

இப்படி ஒவ்வொரு காட்டுக்கும் ஒரு தன்மை இருக்கு. பழங்குடியினர் ஆதியில் இருந்து இப்ப வரை ஒரு வழக்கத்தைக் கடைப்பிடிக்கறாங்க. அது மரம் நடுவது. அவங்க சந்ததில எப்ப குழந்தைப் பிறந்தாலும் உடனே ஒரு மரத்தை நடுவாங்க. அதுக்கு ஒரு பெயரையும் வைப்பாங்க...’’ மூச்சுவிடாமல் காடுகளின் தன்மை குறித்து ஆராய்ச்சியாளர்களுக்கு சமமாகப் பேசுகிறார் மங்களேஸ்வரன். புதுமுகங்கள் நடிக்கும் ‘மரகதக்காடு’ படத்தின் அறிமுக இயக்குநர் இவர்.

எங்கே இருக்குது அந்த ‘மரகதக்காடு’?

அது ஒரு குறியீடு. மேற்குத் தொடர்ச்சி மலைப்பகுதிகள்ல வசிக்கிற காணி இன பழங்குடி மக்களின் நம்பிக்கையையும் வாழ்வியலையும் கனிம வளங்களைப் பாதுகாக்கறதோட அவசியத்தையும் இரண்டு உண்மைச் சம்பவங்கள் வழியா இந்தப் படத்துல பேசியிருக்கோம். அடர்த்தியான காடுகள், அருவினு லொகேஷன்ஸ் பிரமிக்க வைக்கும். பட டீசரை வெளியிட்ட என் குருநாதர் பாரதிராஜா சார், ‘ஒரு டேம்ல இருந்து தண்ணீர் ஃபோர்ஸா 3டி எஃபெக்ட்டில் ஓடி வருதே... அதெல்லாம் கிராபிக்ஸா’னு ஆச்சரியமா கேட்டார். ‘ரியல் ஷூட்’னு சொன்னதும் இன்னும் பிரமிச்சார்.

இந்த ஆச்சர்யமும் பிரமிப்பும் படம் பார்க்கிறவங்களுக்கும் ஏற்படும். இப்படி ஒரு படத்தை தயாரிக்க முன்வந்த கே.ரகுநாதன் சாருக்கு ஸ்பெஷல் தேங்க்ஸ். அவர் இதுக்கு முன்பு கமல் சார் ஹீரோவாக அறிமுகமான ‘பட்டாம்பூச்சி’, ‘மனசுக்குள் மத்தாப்பூ’ உட்பட பதினெட்டு படங்களைத் தயாரிச்சிருக்கார். ‘புத்திசாலி பைத்தியங்கள்’, ‘தாம்பத்தியம் ஒரு சங்கீதம்’னு ரெண்டு படங்களையும் இயக்கின அனுபவஸ்தர்.