கலைமகளான சரஸ்வதி ஏந்தியிருப்பதே வீணைதான். வீணை எனும் ராஜவாத்தியத்திற்கு மயங்காதோர் உண்டோ! அதுவும் தஞ்சை வீணையெனில் அதற்கு எப்போதுமே தனிப்பெருமைதான். தமிழர்களின் பழம்பெரும் இசைக் கருவிகளில் வீணையும் ஒன்று. தெய்வீக இசைக் கருவியான வீணை காலத்தால் அழிக்க முடியாதது. தமிழகம் மட்டுமின்றி இந்தியாவின் பல்வேறு மாநிலம், வெளிநாடுகளுக்கும் தஞ்சையில் வீணை தயார் செய்யப்பட்டு விற்பனைக்கு அனுப்பப்பட்டு வருகிறது. தஞ்சையில் கிட்டத்தட்ட 3 தலைமுறையாக 150 குடும்பங்கள் வீணையை செய்து வருகின்றனர். இப்போது பலரும் இத்தொழிலில் இறங்கினாலும் பாரம்பரிய முறைப்படி செய்வதில் பூர்வீக வீணை தயாரிப்பாளர்களை மிஞ்ச முடியவில்லை.

வீணையின் அழகில் மயங்கும் வெளிநாட்டினர், தஞ்சை வரும்போது அவற்றை செய்யும் இடங்களுக்கு சென்று மறக்காமல் வாங்கிச் செல்கின்றனர். இந்தியாவில் பல்வேறு மாநிலங்களுக்கு அனுப்பப்பட்டாலும் கேரளாவில்தான் வீணையை அதிகம் விரும்பி வாங்குகின்றனர். இதுகுறித்து தஞ்சை வீணை செய்யும் கைவினைஞர் கண்ணன் கூறும்போது, ‘‘வீணையை எல்லாரும் எளிதாக செய்துவிட முடியாது. அதற்கு பொறுமை, பக்தி வேண்டும். வீணையின் உருவம், தந்திகளின் எண்ணிக்கை, வாசிக்கும் முறை என அனைத்தும் காலந்தோறும் மாறிக் கொண்டே இருக்கிறது.

வீணைக்கான மூலப்பொருட்கள் பண்ருட்டி, சென்னை, பெங்களூரு போன்ற பகுதிகளிலிருந்து வருகிறது. மூலப்பொருட்கள் தட்டுப்பாடு உள்ளது. வீணை செய்வோருக்கான கூலியும் குறைவாக உள்ளது. வீணையில் 3 பகுதிகள் உண்டு. தலை, தண்டி, குடம் என பிரிக்கப்படும். இவற்றை தனித்தனியாக பிரித்து செய்து ஒன்று சேர்த்தால் அது சாதாரண ஒட்டு வீணை. ஒரே மரத்தில் முழுமையாக 3 பகுதியையும் செய்தால் அது ஏகாந்த வீணை. ஏகாந்த வீணை தான் வெளிநாடுகளில் அதிகம் விற்பனையாகிறது. தஞ்சாவூர் வீணைக்கு புவிசார் குறியீடு பெற்றுள்ளோம்.